Iri jobaǵa qytaılyq «China Xinxin Corporation» jáne qazaqstandyq «ABK-Avtodor NS» kompanııalary tartylǵan. Sonymen qatar, «Sinohydro Corp Limited» kompanııasy «Balqash – Býrylbaıtal» jolynyń 35,6 shaqyrymyn salýda. Al, «Todini and SMS» birlesken kásiporny «Kúrti – Býrylbaıtal» trassasynyń 62 shaqyrymdyq aýmaǵynyń qurylysyn iske asyrýda. Berdibek Saparbaevpen bolǵan kezdesýge «Uzynaǵash – Otar» jolynyń qurylysyn atqaryp jatqan qazaqstandyq merdigerlik uıym «QazaqDorStroı» mekemesiniń ókilderi de qatysty. Aıta ketý kerek, atalǵan avtojoldyń 16 shaqyrymy Jambyl oblysynyń aýmaǵy arqyly ótedi. Qytaılyq merdigerlermen sóılesken Berdibek Saparbaev olardan Qazaqstannyń zańdaryn qatań saqtaýdy talap etti. Ákim qytaılyq kásiporyndardyń jalaqysynyń tómendigin alǵa tartyp, onyń mólsherin jyl saıyn kem degende 10 paıyzǵa arttyryp otyrý kerektigin atap ótti. Sondaı-aq, Berdibek Saparbaev barlyq jumysshylar úshin kompanııa basshylyǵy teń jaǵdaı jasaý kerektigin aıta kelip, ásirese jalaqy, tamaqtaný jáne júrip-turý máselelerin retteý kerektigin eskertti. Sonymen qatar, Berdibek Saparbaev mal ótkelderin salý jáne jol boıyndaǵy aryqtar men kópirlerdi jóndeý qajettigin de jetkizdi. Sol sııaqty, jol jóndeý jumystarynyń sebebinen jaqyn mańda ornalasqan 13 úıdiń qabyrǵalary jarylǵan. Olardy 15 kúnnen keshiktirmeı jóndeý kerek. Bul úshin 8,5 mıllıon teńge qajet.
«Qazaqstanda bıznestiń áleýmettik jaýapkershiligi degen uǵym bar. Kompanııalar jaqyn mańdaǵy eldi mekenderge, oblys ortalyǵyna áleýmettik máselelerdi sheshýge kómek kórsetýi kerek. Ásirese, koronavırýs jaǵdaıyn eskere otyryp, jaǵdaıy tómen, kópbalaly otbasylarǵa kómektesý qajet. Qazaqstan Respýblıkasynyń zańdary, onyń ishinde «Til týraly Zańy» qatań saqtalýy kerek. Memlekettik tilimiz – qazaq tili. Barlyq mańdaıshalar, onyń ishinde kireberiste ornalasqan kompanııanyń ataýy da qazaq tilinde bolýy kerek. Men taǵy da osynda kelip, bul tapsyrmalarymnyń qalaı oryndalǵanyn tekseremin», dedi Berdibek Saparbaev. Qytaı kompanııalarynyń jetekshileri ákimniń talaptaryna tolyqtaı kelisetindikterin bildirdi. Endi «Merki – Býrylbaıtal» jolynyń bir baǵytynyń qurylysy bıyl aıaqtalyp, jol qozǵalysy qalpyna kele me? Merdigerler qurylysty tolyǵymen jospardan bir jyl buryn, ıaǵnı 2021 jyly aıaqtaı alady ma? Berdibek Saparbaev kompanııalarǵa osy sekildi birqatar saýaldaryn joldady. Talqylaý kórsetkendeı, jol salýshylardyń aldynda eshqandaı kedergiler joq. «Todini and SMS» basshysy oblys ákiminen Moıynqum aýdany aýmaǵynda karerlerdi bólýge kómek berýdi surady. «Eń bastysy, barlyq jumystar ýaqtyly jáne sapaly atqarylýy kerek. Merki jáne Shý aýdandary arasyndaǵy joldyń bir baǵytynyń qurylysyn bıyl aıaqtaý kerek. Jol qurylysynda jergilikti materıaldar paıdalanylyp, al jergilikti adamdar jumyspen qamtylǵany mańyzdy. Jol salýshylar qazaqstandyq óndirýshilermen kelisim-sharttar jasasyp, bıtým qoryn qalyptastyrý kerek», dedi Berdibek Saparbaev.
Jambyl oblysy
