Býndeslıganyń maýsymdyq oıyndary buıyrsa, aldaǵy mamyr aıynyń 16-nan bastalmaq. Baıern Mıýnhen komandasy ótken aıda bas bapker Hansı Flıkpen jasaǵan shartyn uzartty. 2014 jyly nemis quramasy álem chempıonatynda asyr salyp, top jarǵan tusta osy Hansı Flık búgingi Kloze sııaqty kómekshi bapker qyzmetin atqaryp júrgen bolatyn. Sondyqtan da bul ekeýi adamı turǵydan da, kásiptik turǵydan da bir-birin jaqsy biledi.
Mıroslav Kloze 2001-2014 jyldary Germanııa quramasynyń beldi oıynshysy retinde tanylǵan tulǵa. Osy aralyqta qurama sapynda 137 oıyn ótkizip, 71 goldyń avtory atanǵan. Al Baıern Mıýnhen quramynda 98 oıyn ótkizip, 24 gol soqqan eken. Búginderi 41 jasqa tolyp otyrǵan bul azamat 2016 jyly úlken sportpen qoshtasyp, buǵan deıin jasóspirimder komandasyn jattyqtyryp kelgen bolatyn.
