Ernııaz Sátovtiń batyr ataǵyna usynylǵany jóninde alǵash ret osy aýdandaǵy «Jalaǵash jarshysy» gazeti jazdy. Maqala avtory, gazet redaktory Ázız Batyrbekovke habarlasyp, máseleniń mán-jaıyna qanyqtyq. Áriptesimizdiń silteýimen batyrdyń aǵasynyń qyzy Aıjan apaıdy taptyq.
– Bul habardy bizge Nur Otan partııasynyń oblystyq fılıaly men oblystyq qorǵanys isteri jónindegi departament qyzmetkerleri jetkizdi. Negizi ákemiz atadan úsh aǵaıyndy. Úlkeni – meniń ákem Tájibaı, ortanshysy Shernııaz, kishisi osy – Ernııaz. Ernııaz aǵamyzdyń deregi keshteý bolsa da shyqty, al Shernııaz habarsyz ketti. Ákem Tájibaı oqý-aǵartý salasynda, uzaq jyl partııa qyzmetinde jemisti eńbek etken, – deıdi Aıjan apaı.
Ernııaz Sátov aýyl mektebin bitirip, Qyzylorda qalasynda 2 jyldyq kýrsta oqypty. 1918 jyly týǵan ol 21 jasynda áskerge alynyp, soǵys bastalǵan soń maıdanda qalady. Jeńisti jaqyndatqan jaýyngerdiń erligi týraly «Podvıg naroda» jáne «Pamıat naroda» dep atalatyn reseılik saıttarda jazylǵan.
Reseılik aqparat quraldarynda tegi Sıatov dep kórsetilgen jerlesimizdiń 1945 jyldyń 9 naýryzyndaǵy Kıýstrın qalasy úshin bolǵan shaıqasta úlken erlik kórsetkeni baıandalady. Bizdiń jaýyngerlerge bas kótertpeı qoıǵan jaý pýlemetshisiniń jatqan jerin anyqtap, granata tastap jaryp jibergen. Osy urysta jalǵyz ózi 14 nemis sarbazy men bir ofıseriniń kózin joıypty. Vzvodyn bastap, jaý tylyna ótip, 50 fashısti tutqyndaǵan eken. Bir áttegen-aıy, batyrdyń haty da, sýreti de saqtalmaǵan.
Erligi eleýsiz qalǵan batyr esimin ulyqtaý bastamasy Nur Otan partııasynyń «Ardagerlerdi ardaqtaıyq» jobasy aıasynda qolǵa alynyp otyr eken. Qoǵam qaıratkeri Berik Ábdiǵalıulynyń «Umytylǵan qaharmandar» atty kitabynda Ernııaz Sátov erligi laıyqty baǵalanbaı qalǵan maıdangerlerdiń biri retinde atalady. Kitapta Ernııaz sııaqty Keńes Odaǵynyń Batyry ataǵyna usynylyp, biraq ártúrli sebeptermen bul joǵary marapatty ala almaı qalǵan taǵy 3 qyzylordalyq maıdanger týraly derek bar.
Ernııaz Sátovti Keńes Odaǵynyń Batyry ataǵyna 1368-shi atqyshtar polkiniń komandıri, podpolkovnık V.Kýrkasıshvılı 1945 jyldyń 19 naýryzynda usynypty. Tórt kúnnen keıin bul usynysqa 416-shi dıvızııa komandıri, general-maıor D.Syzranov qol qoıady. Osy jylǵy 2 sáýirde áskerı keńestiń sheshimi shyǵyp, ony 5-shi armııa qolbasshysy general-leıtenant N.Berzarın, keńes múshesi, general-leıtenant F. Bokov qoldaryn qoıyp, bekitedi.
Biraq nege ekeni belgisiz qandaı urysta da qaımyǵyp qalmaı, aldyńǵy shepten tabylǵan jaýyngerdiń erligi «Qyzyl Juldyz» ordenimen baǵalanady.
Partııa fılıalynyń qyzmetkerleri Ernııaz Sátovpen qatar «Umytylǵan qaharmandar» kitabynda esimderi atalatyn Orda Erjanov, Pirimjar Baımahanuly, Musa Ryskeldıev sekildi erler esimin máńgi este qaldyrý maqsatynda qalalyq, aýdandyq onomastıkalyq komıssııalarǵa usynys engizdi.
– Aǵamyzǵa berilgen «Qyzyl Juldyz» ordeni Jalaǵashqa jetkende ákem bar edi, inisiniń habary shyqqanyna qatty qýanǵanyn áli umytpaımyn. Al ájemiz Úmitaı Shernııaz ben Ernııazyn ómir boıy joqtap ótti. Altynbek Qorazbaev aıtatyn «Qara kempir» áni soǵystan ketken ulynyń habaryn úmitpen kútken kúlli analardyń zar-muńy ǵoı. Meniń ájem de jylaı-jylaı eki kózden qalyp, 1977 jyly 90 jasynda qaıtys boldy, – deıdi batyrdyń qaryndasy.
Osylaısha jerlesimizge sonaý 1945 jyly berilýi tıis nagradanyń habary 75 jyldan keıin belgili bolyp otyr. Bul erliktiń el jadynan eshqashan óshpeıtindiginiń dáleli bolsa kerek.
Qyzylorda
