Keshe lentadan keńseniń ishinde túsken sýreti aınaldy. Siresip kıinip, galstýgyna qylǵyna jazdap turǵany azdaı, kózildiriginiń ar jaǵynan shytynap qaraıdy. Qyzmetiniń de, óziniń de mańyzdylyǵyn kópke kórsetkisi keletin túr.
Búgin tańerteń úı ishindegi beınesine kózaıym boldyq. Taǵy da ózi otyr. Az-azdap, qunarly as jeý kerektigi týraly shaǵyn ǵana jazbasy bar.
Erteń ol áleýmettik jelige meıramhanada túsken sýretin jarııalaıdy. Múmkin ol sýretke bir jyl buryn túsken shyǵar. Ol ýaqytpen sanasyp jatpaıdy. Onyń sol jerde bolǵany aıdan anyq. Múmkin ol áldebir mańyzdy jıynǵa qatysqanyn kórseter? Álde dosynyń úıine qonaqqa barar? Qaıtse de jalǵyz ózi túsken sýretin osynda salady. Oǵan men shúbá keltirmeımin.
О́zgeris
Saǵan ózgerý kerek. Bilesiń be, seni ózgertetin kitaptar bar. Olardy oqyǵan soń aınalańa múlde basqa kózben qaraı bastaısyń. Tabıǵı, erkin, batyl, qaıyrymdy, eń bastysy, sanaly janǵa aınalasyń. О́miriń ózgerip, tabysyń artady, syı-qurmetke ıe bolasyń. Til tabysa almaı júrgen qarsylastaryńmen aradaǵy barlyq másele óz-ózinen sheshiledi. О́mirińniń sapasy artady. Sen endi kúnkóris úshin emes, uly maqsattar úshin jumys isteıtin bolasyń.
Saǵan ózgerý kerek. Erteńge qaldyrma, búginnen basta. Myqty keńesshilermen baılanysyp, olardyń jıyndaryna qatys. Múmkindikti barynsha paıdalan. Olarǵa kópshiliktiń ne úshin qyzyǵatynyn bilip al. Olardyń ómirlik tájirıbesin zertte. Eń basty maqsatyń – ózińdi ózgertý. Sondyqtan eń birinshi neden bastaý kerektigine mán ber.
Saǵan ózgerý kerek...
Qulaǵym sarsydy, kózim tundy. Osydan qashyp qutyla almaıtyn sııaqtymyn. Dostarym sońymnan qýyp júrip osyny aıtady, týystarym osyndaı maǵynadaǵy hat joldaıdy, tanystarym qalaı ózgergenin aıtyp maqtanady. Túsimde de minezi jumsaq, óńi jaıdary, ýaıymy joq ámbebap adamdar «saǵan ózgerý kerek» dep jymıyp turatyn boldy...
Qubylys
«Tańǵajaıyp talant. Taý sýyndaı surapyl sózderdiń ıesi. Alty qurlyqta kezdespegen qubylys».
Ádebı keńistikte qalyqtap júrgen osy sózder jas synshyǵa ájepteýir áser etken. «Bul neǵylǵan qubylys, men nege ol jaıynda jazbaımyn» dep tóseginde biraz kún dóńbekshidi. Sosyn eshqandaı daý týdyrmaıtyn, ýaqyt synynan súrinbeı ótken myqtylardy qaýzaı bermeı, bir aýyq «jańa qubylys» týraly da «áý» dep qoıýdy oılastyrǵan. Biraq ol oǵan úlgere almady. О́ıtkeni olardyń qatary kóbeıip ketip edi. Ádebıetke endi kelgen, bolashaǵynan úmit kúttiretin jastardyń birtalaıyna osy «anyqtama» op-ońaı úlestirildi. Gazet-jýrnaldar olardyń aty-jóniniń qasyna «qubylysty» qoıyp basyp jatty. Telearnadan «qubylys» degen baǵdarlama ashyldy. Sóıtip jurt qubylystyń bastapqy maǵynasyn umytyp qaldy. Synshy da umytty.
