Sevara Nýrmatova Taraz qalasyna 2016 jyly kóship keledi. Qalaǵa kóship kelýdegi maqsaty júzýmen aınalysyp, sporttyq daǵdylaryn damytý bolǵan. Degenmen qalalyq «Múgedek jastar qoǵamy» Qoǵamdyq birlestigimen tanysqanda onyń oıy kúrt ózgerdi. Osy uıymnan jumys boıynsha jaqsy usynys túsip, óziniń burynnan beri armandaǵan isi – qolónermen aınalysý múmkindigine ıe boldy. Osylaısha «Úmit» jobasynyń eńbek baǵyty boıynsha nusqaýshysy bolyp jumysqa ornalasty. Ýaqyt óte kele birlestik basshylarynan jańa «Dóńgelekti dúken» jobasyn damytýǵa usynys kelip tústi.
«Osy joba boıynsha jumys jasaýǵa usynys túskende esh oılanbastan kelistim. Sebebi bul men úshin jańa tájirıbe bolatyn. Men árqashan erekshe adamdarmen birge ádemi ári paıdaly kádesyılardy jasaýdy armandaıtynmyn. О́ıtkeni mundaı adamdardyń qııaldary óte utqyr, sózben túsindire almaıtyn dúnıelerin qolmen jasalǵan buıymdar arqyly jetkizedi», - dep Sevara óz oıymen bólisti.
«Samruk-Kazyna Trust» Qorynyń qoldaýymen «Dóńgelekti dúken» jobasy aıasynda múgedektigi bar adamdardy oqytý jáne jumysqa ornalastyrýǵa daıyndaý úshin uıymnyń materıaldyq-tehnıkalyq bazasy jaqsartyldy. Atap aıtqanda tigin mashınasy men lazerlik qondyrǵy satyp alyndy. Bul qurylǵylar jumystyń tıimdiligin edáýir arttyrdy: jumys qarqyny artyp, shyǵarylatyn ónim kólemi kóbeıdi.
Sevaranyń úılestirýimen jumys jasaıtyn dúkenniń sheberhanasynda psıhonevrologııalyq aýrýlary bar adamdar jumys jasaıdy. Sheberler joba aıasynda kıiz, keramıka, tas, aǵashtan jasalǵan halyq shyǵarmashylyǵynyń kádesyı ónimderin daıyndaý daǵdylaryn meńgerdi. Olardy qolóner jasaýǵa úıretý arqyly qoldaý kórsetý, jumysqa ornalastyrý jáne áleýmettendirý – «Dóńgelekti dúken» jobasynyń basty maqsaty.
Sonymen qatar, «Dóńgelekti dúken» jobasy aıasynda múmkindigi shekteýli adamdar óz qoldarymen jasalǵan buıymdardy sata alatyn avtobýs usynylyp, qoljetimdi áleýmettik baǵdar quryldy. Sondaı-aq qolónerdi úırenip óz isin ashqysy keletinderge arnap sheberlik sabaqtary ótkizilýde.
Resmı derekterge súıensek, qazirgi tańda Taraz qalasynda 11 000-daı múmkindigi shekteýli jandar turady, onyń úshten bir bóligi ǵana jumyspen qamtylǵan. Dál osy sııaqty jobalar adamdarǵa súıikti qolónermen aınalysýǵa jáne odan tabys tabýǵa kómek beredi.
«Árekettiń» maǵan bergen tájirıbesi mol. Osy jobanyń arqasynda sheberhanamyzdyń jumysy alǵa basyp, 15 adamdy oqýdan ótkizip olardyń barlyǵyn jumysqa ornalastyrdyq. Olardyń arasynda jasy da kárisi de bar. Jobadaǵy eń basty jetistigim – ózimmen taǵdyrlas adamdarǵa kómek bere alǵanym, olardyń alǵysyna bólengenim. Qazirde oqýdan ótken sheberlerdiń kópshiligi ózdiginen, meniń kómegimsiz-aq keremet dúnıeler jasaı alady», - dep aǵynan jaryldy Sevara.
Álemde jarııalanǵan karantın bul dúkenge de áser etti. Sońǵy 2 aı kóleminde sheberler qashyqtyqtan jumys jasap keledi. Jumys bir júıege keltirilgen: qajetti shıkizat materıaldar jumysshylardyń úıine jetkiziledi, sodan keıin berilgen tapsyrys nemese qajettilikke baılanysty buıymdar daıyndalady. Ázirlengen buıymdardy sheberhanaǵa jetkizilip ary qaraı satýǵa qoıylady, tapsyrys arqyly jetkiziledi.
Sevaranyń aıtýy boıynsha «Dóńgelekti dúken» jobasynda jınaqtaǵan tájirıbe basqa baǵyttardy baǵyndyrýǵa yqpal etýde jáne karantın kezinde maskany alýshylar sany artqandyqtan, sheberler kóp rettik maskalardy tigip, jetkizip berýmen aınalysty. Sonymen qatar, dúkenniń jumysyna tánti bolǵan jandar óz tapsyrystaryn berýde. Sáýir aıynyń ózinde shahmat toptamasyn jasaýǵa 8 tapsyrys túsken.
Bolashaqta sheberhana qyzmetin keńeıtip, barlyq jaǵynan tabysty uıymǵa aınalý josparlanýda. Bul bıznes ınkýbatordyń bir túri retinde múmkindigi shekteýli adamdardy qoldanbaly ónerge jáne tigýge úıretetin bolady. Jáne olar óz oqýyn aıaqtaǵannan keıin de jan-jaqty qoldaý kórsetiletin bolady.
Bul jetistikter áleýmettik kásipkerlik baǵytynda jasalyp jatqan dúnıeniń bir bóligi. «Dóńgelekti dúken» Sevara Nýrmatova jáne onyń qol astynda jumys jasaıtyn jandar úshin baǵaly oryn. Sebebi olar dál osy ortadan ózderin tapty, qoǵammen aralasyp, belsendi ómir súrip, óz tabystaryn adal eńbekpen tabýda. Osylaısha aımaqtarda «Áreket» jobasynyń basty maqsaty - áleýmettik kásipkerlikti damytý júzege asyrylyp jatyr.
