...josparyn aıtady
Abaıdy oqyp júrmin
«On besinshi» qara sózinde uly oıshyl Abaı bylaı deıdi: «Egerde esti kisilerdiń qatarynda bolǵyń kelse, kúninde bir mártebe, bolmasa jumasynda bir, eń bolmasa aıynda bir, ózińnen óziń esep al!» Atalǵan ǵaqlııa sózben tanysqannan keıin men aptanyń sońǵy kúnderi ózimnen ózim esep alatyn boldym... Men osy apta boıy ne istedim, neni istep úlgerdim, ne nársege úlgere almaı qaldym? degen saýaldardy qoıa bastadym. Buǵan jaýap tabý úshin, eń aldymen, jospar qurý kerektigin uqtym. Keıin sol jospardyń oryndalý, júzege asyrylý joldaryn taldaýdy úırendim...
Sońǵy jyldary mektepterde 9 synyptan bastap «Abaıtaný» kýrsy oqytyla bastady. Osy sabaq maǵan erekshe unaıdy. Biz sabaq barysynda Abaı Qunanbaıulynyń óleńderin, qara sózderin, poemalaryn taldaý arqyly aqynnyń bizge jetkizgisi kelgen oılarynyń túpki túıinin túsine bastadyq. Qaı týyndysyn taldasaq ta, ustazymyzdyń baǵyttaýymen «Tolyq adam» fılosofııalyq ilimimen bolashaq ómirimizdi baılanystyryp otyrdyq.
Malıka QAIRAT,
M.Jumabaev atyndaǵy PGK janyndaǵy jalpy bilim beretin mektep-lıseıdiń 11 synyp oqýshysy
Soltústik Qazaqstan oblysy
...alǵysyn bildiredi
Bar ǵalam meıirimge bas ıedi
Meniń mektep bitirgenime bıyl 53 jyl bolypty. Búginde aıaýly ana, nemerelerim men shóberelerimniń ortasynda meıirimge bólengen ardaqty ájemin. Soǵan qaramastan áli kúnge deıin ustazdarymdy esimnen shyǵarǵan emespin. «Jaqsynyń jaqsylyǵyn aıt, nury tasysyn» demeı me qazaq, sóz oraıyn paıdalana otyryp, burynǵy ataýy boıynsha «Qazaq-Túrik lıseıiniń» ujymyn, sonymen qatar Nur-Sultan qalasyndaǵy Aqan Qurmanov atyndaǵy №17 mektep-gımnazııanyń dırektory Ramzııa О́mirbaevany, bilikti muǵalimder Jamal Malǵazdarova men Almagúl Tóleýqazyqyzyn aıryqsha atap ótkim keledi. Bizdiń ýaqytymyzda oqýlyq qana basty qural sanalatyn, al qazir zaman talaby túbegeıli ózgerdi. Balalar tórtinshi toqsandy qashyqtan oqyp bitirdi. Ustaz da, oqýshy da osy jańa júıege az ýaqytta beıimdelip aldy. Nemerelerimniń ustazdary meıram saıyn elep-eskerip, beınebaıan arqyly quttyqtap otyrady. Bar ǵalam meıirlene bas ıetin ustaz qaýymyna qandaı qurmet kórsetilse de jarasady. Bala tárbıesine sanaly ǵumyryn arnaıtyn barsha ulaǵatty ustazdardyń eren eńbegine basymdy ıip, alǵysymdy bildiremin.
Aıman Maǵzıqyzy,
zeınetker
Nur-SULTAN
...jaqsylyǵyn jetkizedi
Tank jasaýǵa 15 000 som jibergen
1942-1943 jyldary halyqtan jınalǵan qarjyǵa 10 tank kolonnasy, birneshe avıasııa eskadrılıasy, torpedalyq katerler men jeke ushaqtar jasaldy. Jalpy, soǵys jyldary Qazaqstan halqy áskerı tehnıka jasaýǵa 480,3 mln som qarjy qosty. Maıdanǵa kómek bergen mundaı erler Qazaqstannyń qaı túkpirinen bolsa da tabylyp jatty. Qarjylaı kómek joldaýshylardyń arasynda qorǵa óz qaltasynan 150 000 som salǵan Qaıyrbek Bájeneev te bar edi.
– Avıasııa eskadrılıasyn jasaý qoryna 150 000 som beremin. Al soǵysqa, Qyzyl Armııaǵa budan bylaı azyq-túlikpen de kómektesip otyramyn. Eger Otanymyz kerek etse, shybyndaı janym, qasyqtaı qanym qalǵansha elimizdi jaýdan qorǵaýǵa daıynmyn! – degen edi «Jańa uıym» kolhozynyń tóraǵasy Qaıyrbek atamyz.
Osy aıtqan sózinde turyp, Qaıyrbek Bájeneev 1943 jyly Kalının maıdanyndaǵy jaýyngerlerge óz menshigindegi 10 qoıyn soıyp, syı-sııapat joldaıdy. Dál osy jyly tank kolonnasyn jasaý qoryna 15 000 som jiberedi.
Janargúl QADYROVA
Pavlodar oblysy,
Baıanaýyl aýdany
...úlgi tutady
О́mirdiń máni kúrespen ólshenedi
Taǵdyr tálkegine ushyrap, sansyz ádemilikti kózimen kóre almaıtyn jan qanshama. Men olardyń ómirge qushtarlyǵy men kásipke adaldyǵyna súısinemin. Keıde on eki múshesi saý adamdardyń ózi ómirden tııanaqty ornyn tappaı, adasyp júredi. Al kerisinshe zaǵıp jandardyń arasynan ómir synynan súrinbeı ótip, túrli kásipte baǵy janyp jatqan tulǵalardy jıi kezdestiresiz.
Resmı málimetterge súıensek, Qazaqstanda 600 myńnan astam múmkindigi shekteýli adam turyp jatyr. Bul jalpy halyq sanynyń 3,5 paıyzyn quraıdy. Solardyń 69 myńy balalar eken. Kóz janary sýalsa da, kókirek kózderi syńǵyrlap turǵan mundaı jandardan óz basym tabandylyqty, qaısarlyqty boıyma sińirdim. Olardan ustamdylyqty, qıyndyqqa moıymaýdy úırendim.
Kógershin IGSATOVA,
Pavlodar qalasy zaǵıp jáne nashar kóretin azamattarǵa arnalǵan oblystyq arnaıy kitaphananyń kadr boıynsha ınspektory
