- Tarıhı-mádenı keshender aýmaǵynda júrgiziletin jumystar Ádisnamalyq keńes aıasynda retteledi jáne barlyq tarıhı qaıta qurý jáne arheologııalyq jumystar IýNESKO ókilderimen kelisiledi. «Rýhanı jańǵyrý» baǵdarlamasy óńirlerdegi tarıhı-mádenı obektilerdiń ınfraqurylymyn kúsheıtýge serpin berdi. 2019 jyly elimiz boıynsha 2 mýzeı, 7 mádenıet úıi, 11 aýyldyq kitaphana ashyldy, - dedi Aqtoty Raıymqulova.
Osy rette mınıstr Mańǵystaý oblysynyń belgili memleket jáne qoǵam qaıratkeri Ábish Kekilbaev atyndaǵy ortalyqty erekshe atap ótti.
- Ábish Kekilbaev atyndaǵy ortalyqtyń saltanatty ashylýyna Memleket Basshysy qatysty. Ortalyq janynan mýzeı ashylyp, jyl sońyna deıin kitaphana men teatr qurylysyn aıaqtaý josparlanýda. Sondaı-aq týrıstik qyzyǵýshylyqty damytýdyń tirek núkteleri retinde vızıt-ortalyqtar qurylysy júrgizilýde. Bul vızıt-ortalyqtar óńirdiń tarıhı-mádenı murasyn qazaqstandyq jáne sheteldik azamattar arasynda ilgeriletýge yqpal etetin bolady, - dedi ol.
Onyń aıtýynsha, elimizdiń barlyq jetekshi mýzeı-qoryqtarynyń aýmaǵynda vızıt-ortalyqtardyń qurylysy, mýzeıfıkasııa jumystary júrip jatyr. О́tken jyly Túrkistan oblysyndaǵy «Otyrar» jáne Almaty oblysyndaǵy «Tańbaly» vızıt-ortalyqtarynyń qurylysy aıaqtalǵan. Bıylǵy jyly «Ulytaý», «Gaýhar ana», «Ordabasy» jáne «Saýran» mýzeı-qoryqtarynyń vızıt-ortalyqtary qurylysyn aıaqtaý josparlanyp otyr. 2021 jyldan bastap bul qatarǵa «Esik», «Berel», «Shilikti» qosylady.
