- 2019 jyly respýblıkalyq teatrlar 1600 astam qoıylym kórsetip, 32 jańa spektakldi júzege asyrdy. Olardyń qatarynda «Attıla jáne Aesıı», «Qulager» qoıylymdarynyń, «Jızel» jáne «Bolero» baletteriniń tusaýkeseri ótti. «Astana Balet» teatrynda «Koncherto Barokko», «Zolýshka», «Shopenıana» baletteriniń premerasy jáne «Seriler saltanaty» mınıatıýrasy qoıyldy. «Astana Opera» teatrynda «Don Karlos», «Evgenıı Onegın», «Bogema» operalarynyń jáne «Jızel», «Koppelııa», «Bethoven» baletteriniń premerasyn kórermenderge usyndy, - dedi Aqtoty Raıymqulova.
Sondaı-aq ol Abaı atyndaǵy Qazaq memlekettik akademııalyq opera jáne balet teatry men «Astana Opera» teatry TMD elderiniń úzdik opera jáne balet teatrlarynyń TOP-5 reıtıngisiniń qataryna engenin aıtty. Nartaı Bekejanov atyndaǵy Qyzylorda oblystyq qazaq mýzykalyq-drama teatry men Sáken Seıfýllın atyndaǵy Qaraǵandy oblystyq drama teatryna Qazaqstan Respýblıkasy Úkimetiniń qaýlysymen akademııalyq mártebe berildi.
