Agroónerkásip kesheninde jańa saqtandyrý júıesi iske qosyldy

2004-jyldan beri О́simdik sharýashylyǵyn mindetti saqtandyrý júıesi jumys istep kelgen bolatyn. Al, myna jańa júıe odan erekshe bolmaq.

Birinshiden, agroónerkásip keshenindegi saqtandyrý endi erikti túrde bolady. Ekinshiden, salalarǵa shekteý joq. Agrarlyq sektordyń kez kelgen baǵyty saqtandyrylady. Úshinshiden, saqtandyrý syıaqylaryn memleket sýbsıdııalaıdy. Bul aýyl sharýashylyǵy taýarlaryn óndirýshilerdi yntalandyrýǵa jáne saqtandyrý shartyn jeńildetýge baǵyttalǵan. Saqtandyrý syıaqysomasynyń 50 %-yn memleket sýbsıdııalaıdy. Ol úshin bıyl respýblıkalyq bıýdjetten 2,5 mlrd teńge bólindi.

- Jańa júıeni ázirleý kezinde ósimdik sharýashylyǵyndaǵy mindetti saqtandyrýdyń problemalyq máseleleri eskerildi, - deıdi «Aýyl sharýashylyǵyn qarjylaı qoldaý qory» AQ Basqarýshy dırektory – basqarma múshesi Asqar Qalıev. - Máselen, aýyl sharýashylyǵy taýaryn óndirýshilerdiń múddelerin qorǵaý maqsatynda júıede Qazaqstan Respýblıkasynyń Qarjy naryǵyn retteý jáne damytý jónindegi agenttiktiń lısenzııasy bar saqtandyrý kompanııalary ǵana jumys isteı alady.

Jańa júıede álemdik saqtandyrý naryǵynda «A» reıtıngi bar úsh halyqaralyq qaıta saqtandyrý kompanııasy jumys isteıtin boldy. Olar otandyq kompanııalar saqtandyratyn táýekelderdi qaıta saqtandyrady. Bul saqtandyrý táýekelderi týyndaǵan jaǵdaıda kepildi tólemderdi qamtamasyz etýge múmkindik beredi.

Shart jasasýdan bastap tólemmen aıaqtalatyn barlyq prosedýralar elektrondy sıfrlyq qoltańba arqyly Qoldau.kz elektrondy platformasynda júrgiziledi. Prosesterdi avtomattandyrý adamı faktordy azaıtady jáne jumystyń ashyqtyǵyn qamtamasyz etedi.

Ylǵal deńgeıiniń monıtorıngi turaqty negizde júrgiziledi jáne saqtandyrý jaǵdaıynyń derekteri avtomatty túrde tirkeledi.

Saqtandyrý jaǵdaıy týyndaǵany týraly Qoldau.kz júıesindegi jeke kabınetine nemese jeke elektrondy poshtasyna kelgen habarlamany alǵannan keıin saqtanýshy (aýyl sharýashylyǵy ónimin óndirýshi) tólem jasaıtyn saqtandyrýshyǵa (saqtandyrý kompanııasyna) ótinish beredi.

Burynǵy júıedegi alynǵan derekter boıynsha saqtandyrý jaǵdaılarynyń 60 %-ten astamy ylǵaldyń jetispeýinen, ıaǵnı qurǵaqshylyqqa qatysty boldy. Osyǵan baılanysty ónimdi qurǵaqshylyqtan saqtandyrý erekshe mańyzǵa ıe. Sondaı-aq egis naýqanynyń aıaqtalý merzimi de eskeriledi.

Ylǵaldyń jetispeý qaýpinen saqtandyrý úshin aýyl sharýashylyǵy taýaryn óndirýshiler bıyl 15 maýsymǵa deıin saqtandyrý shartyn jasasýy qajet. Saqtandyrý kezeńi 3 aıdy qamtıdy. Iаǵnı,15-mamyrdan 15 tamyzǵa deıingi aralyq esepke alynady.

Ylǵaldyń shamadan tys bolýyna qatysty saqtandyrý kelisimshartyn 15 tamyzǵa deıin bekitý qajet. Saqtandyrý 2020-jyldyń 15 tamyzynan 15 qyrkúıegine deıingi aralyqta júrgiziledi.

Aldaǵy ýaqytta agroónerkásip keshenindegi saqtandyrý ónimderiniń naryqtaǵy qajettiligi eskerilip, tizimi keńeıtiletin bolady.