Taıaýda, "Evrazııa Invest LTD" kompanııasy Saubota brendimen Qytaıǵa, atap aıtqanda Gansý provınsııasyndaǵy Lanchjoý qalasyna túıeniń 3,5 tonnadan astam qurǵaq sútin jóneltti.
"Osylaısha qazaqstandyq taýardyń QHR-ǵa eksporttalýynyń resmı bastamasy júzege asyryldy. Osy sátti biz bes jyl kúttik. Qytaı naryǵyna kirý óte qıyn bolǵandyqtan, kóp jumys júrgizildi", – dedi atalǵan kompanııanyń basshysy Qadyrbek Meırambekov.
Eske salsaq, 2020 jyldyń qańtar aıynda qazaqstandyq úsh kásiporyn QHR Bas keden basqarmasynyń ımporttaýshylar tizimine engen edi. Olardyń qatarynda Saumal brendi bar "Evrazııa Invest LTD" JShS-i de boldy. Jalpy, atalǵan kompanııanyń bıe sútinen untaq óndiretin zaýyty Qaraǵandy oblysynda 2014 jyldan beri jumys istep keledi. О́tken jyly kásiporyn Saubota brendimen túıeniń qurǵaq sútin shyǵarýdy ıgergen bolatyn. Qazirgi tańda zaýyt aıyna eki tonna qurǵaq sút ónimin óndiredi.
"Evrazııa Invest LTD" JShS-niń bas dırektory Qadyrbek Meırambekov kásiporynnyń ótken jyly "Qorǵas" shekara mańy yntymaqtastyǵy halyqaralyq ortalyǵyna 609 mln teńgege ónim satqandyǵyn málim etti.
"Satylym bıyl da artady dep úmittengen edik. Alaıda, qańtar aıynda shekara jabyldy, «Qorǵastyń» saýda alańy áli ashylǵan joq. Sondyqtan, basqa joldy tańdadyq ta, óndiristi sertıfıkattap, ruqsatty rásimdep, qazir Qytaıǵa birinshi partııany jóneltip otyrmyz", – dedi ol.
Kompanııanyń Qytaı naryǵyna ilgerileýine Qazaqstan Respýblıkasy Aýyl sharýashylyq mınıstrligi men Aýyl sharýashylyq ónimderin eksporttaýshylar qaýymdastyǵynyń kómekteskenin de aıta ketken lázim.
Qaraǵandy oblysy
