• 05 Qazan, 2013

Júgensizder oryndyǵyna jeti polıseı otyrdy

251 ret

kórsetildi

3 mın

oqý úshin

Egemen Qazaqstan

05-10-13-politsia-1

Polıseılerge qatysty taǵy bir janjal Aqmola oblysyn dúr silkindirdi. Joǵary laýazymdy ofıserler kisi ólimi faktisin jasyrmaq bolyp, óli taksıshiniń denesin kómip tastapty. Olar munymen qoımaı, osy sumdyq qylmysty kózimen kórgen eki kýágerdi urlap áketken. Bul týraly «Eskpress-K» gazeti jazdy. О́tken jylǵy 12 tamyzda Aqmola oblysynyń Qostomar selosynyń turǵyny dalada jartylaı kómilip jatqan bir er kisiniń máıiti ústinen túsedi. Sol boıda polısııaǵa habar beredi. Tergeý boljamy boıynsha, Arshaly aýdandyq ishki ister bóliminiń basshysy Baqtybaı Sahanov statıstıkany búldirmeý úshin ózinshe jospar qurady. Osyǵan sáıkes, tártip saqshylary qylmysty ashýǵa tez kirisý bylaı tursyn, quddy ony bolmaǵandaı etip qoıýǵa baryn salady. Sóıtip, olar máıtti qapqa salyp alyp, ormannyń ishine aparyp, kómip tastaıdy. Budan ári polıseıler tutas bir spektakldi bir ózderi oınap shyqty. Sonyń jelisinde jergilikti bir turǵyndy qazylyp qoıylǵan shuńqyrǵa jatýǵa májbúr etedi. Sosyn onyń ústine azdap topyraq tastap, sýretke túsirip alady. Bul olarǵa qazylǵan shuńqyrda ólgen kisiniń máıiti emes, kádimgi mas adamnyń jatqanyn jorta «dáleldeýge» kerek bolypty. Bálkim, aty-jóni belgisiz marqum sol kúıi tanylmastan kete berer me edi, eger ony týǵan-týystary qaıta-qaıta jar salyp izdete bermegende? Olardyń biri – kenet úshti-kúıli joq bolyp ketken taksıshi Bazarbaevtyń qaryndasy Astana qalasynyń ishki ister departamentine osyǵan baılanysty shaǵym túsiredi. Astanalyq jedel izdestirý qyzmetkerleri, abyroı bolmaǵanda, ony óltirip, Qostomar selosy mańyna kómip ketken qylmyskerlerdi tez tapty. Biraq kisi óltirýshiler kórsetken shuńqyrda marqumnyń máıiti joq bolyp shyqty. Bul pınkertondardy birden tuıyqqa tirep tastady. Osy kezde máıittiń qatty izdestirilip jatqanynan habardar bolyp úlgergen Baqtybaı Sahanov qaraýyndaǵylarǵa óliktiń jaıyn biletin joǵarydaǵy eki kýáni – máıitke kezigip, polısııaǵa habar bergen adam men shuńqyrǵa túsip, mastyń rólin oınap shyqqan jigitti shuǵyl tyǵyp qoıýdy buıyrady. Osyǵan sáıkes, arshalylyq tártip saqshylary ózderiniń astanalyq áriptesteriniń isterine qarsy jumys jasap, aıtylǵan adamdardy jergilikti sharýashylyqtyń aýmaǵyna aparyp qamaıdy. Biraq kóp uzamaı qamaýdaǵy kýálardyń biri qashyp shyǵyp, birden Astana polısııasyna keledi. Sol-aq eken, ishki ister salasyn dúrbeleńge salǵan álgindegi janjal dý etip kóterile jóneledi. Sol boıda Arshaly aýdandyq ishki ister bóliminiń barlyq laýazymdy quramy birden qamaýǵa alynady. Olardyń arasynda basshyny qosa eseptegende, jeti ofıser bolady. «Atalmysh is boıynsha tergeýdi Arshaly aýdanynyń prokýrory Baýyrjan Qusaıynovtyń ózi júrgizdi. Qazirgi ýaqytta tergeý tolyq aıaqtalyp, is sotqa ótkizildi. Is boıynsha kúdikti retinde aýdandyq ishki ister bóliminiń bastyǵy, onyń eki orynbasary jáne taǵy tórt qyzmetker jaýapqa tartylyp otyr», - degen túsindirme jasady Aqmola oblysy prokýrorynyń baspasóz hatshysy Aqqý Múrsálimova. Qurysh Nurymbet.