Vengrııanyń Kaposhvarı qalasyndaǵy ýnıversıtettiń stýdent qyzdary oqý ornyndaǵy semınarlardyń birin qazan aıynyń basynan engizilgen jańa dress-kodqa qarsylyq retinde ish kıimderimen ótkizdi. Al «jalańash semınardyń» beınejazbasy jergilikti Kapos Pont telearnasynan kórsetildi. Bul týraly «Lenta.rý» habarlady.
Aksııaǵa barlyǵy 11 stýdent qyz qatysty. Olar aýdıtorııaǵa kirisimen, ish kıimderine deıingi kıimderin túgel sheship tastap, aldaryn oqýlyqtarmen jaýyp, semınar ótkizdi.
Madıar qyzdarynyń mundaı aksııa ótkizýlerine Kaposhvarı ýnıversıteti basshylyǵynyń jańa tártibi sebep bolǵan. Jańa mızamǵa sáıkes, stýdentter men oqytýshylarǵa joǵary oqý ornynyń aýmaǵyna qysqa ıýbkamen, shortpen, aspa baýly nemese janyndaǵy tiligi uzyn kóılekpen jáne súıretpe aıaqkıimmen kelýge tyıym salynǵan. Budan bólek, ashyq makııaj ben iri aksessýar jasaýǵa, ıisi ótkir átir sebýge ruqsat etilmegen. Al er kisiler, osy tártipke saı, oqý ornyna tek qara qoshqyl tústi kástómmen kelýge tıis-tin.
Ýnıversıtet rektory tek jazdyń ystyq kúnderinde ǵana jeńil kıimdermen júrýge múmkindik beripti. Aksııaǵa qatysýshy stýdentter erejeniń osy tarmaǵyna súıenip, óz únderin bildirgen kórinedi. Olar aýdıtorııalardyń ystyq ekeni sondaı, sheshinip otyrmasa bolmaıtynyn alǵa tartqan.
Endi stýdentter jańa aksııa daıyndap jatqanǵa uqsaıdy. Qyzdar endi sabaqqa súıretpe aıaqkıimmen jáne jaǵajaı súlgisimen kelmekshi.
Murat Aıtqoja.
