Qaırat Dosaevtyń aıtýynsha, búginde oblysta eńbekkerlerdiń jumystan qysqartylýyna, quqyqtarynyń buzylýyna jol bermeý úshin ákimdikter men kásiporyndar arasynda óndiristik prosesterdi turaqtandyrý máseleleri boıynsha 8274 memorandým qabyldanǵan eken. Bul kórsetkish tirkelip, jumysyn júrgizip jatqan zańdy tulǵalardyń 90,1 prosentin quraıdy. Bul rette Berdibek Saparbaev kásiporyndar men mekemelerde ujymdyq sharttar men úshjaqty memorandýmdardyń jasalýyna jáne onyń oryndalýyna basa mán berip otyr. Búginde bul baǵytta jumystar jandanyp, elektrondy eńbek sharttaryn jasaýǵa kóshý týraly talaptar da qoıylyp otyr. "Ujymdyq shart – jumysshylardyń quqyǵyn qorǵaıtyn birden-bir qujat. Sondyqtan eńbek qatynastaryn retteıtin úshjaqty komıssııa, kásipodaq uıymy óńirdegi árbir mekemede osy sharttyń jasalýyn qadaǵalap, soǵan yqpal etýi tıis. Biz kásiporyndardy aralap, basshylardyń óz jumyskerleriniń aldynda ujymdyq sharttyń oryndalýy týraly esebin tyńdaý úrdisin tájirıbege engizýimiz kerek. Mine, sonda eńbekker óziniń quqyǵy týraly, al basshylyq tarap ujymmen jasasqan sharttardy oryndaý kerek ekenin biletin bolady", dedi Berdibek Saparbaev.
Máselen, ótken 5 aıda oblystaǵy eńbek ujymdarynda 44 ujymdyq shart jasalyp, onyń barlyǵy da eńbek ınspeksııasynyń monıtorınginen ótken. Basqarma basshysynyń aıtýynsha, óńirimizde tirkelip, jumysyn júrgizip jatqan 9252 uıymnyń 55,4 paıyzynda basty eńbek sharty qoldanysta eken.
Alaıda oblystyq kásipodaqtar birlestiginiń tóraǵasy Meırambek Tólepbergen óńirdegi eń iri óndiris orny Moıynqum aýdanyndaǵy "Aqbaqaı" ken ornynyń osy talapty oryndamaı otyrǵanyn aıtty. Al, Taraz qalasynyń ákimi Aıtqazy Qarabalaev oblys ortalyǵyndaǵy meıramhanalarda negizinen kásipkerlik nysannyń ıesi, admınıstrator jáne esepshiler ǵana jumysshy retinde tirkelgendikten, ony oryndatý ońaıǵa soqpaı turǵanyn jetkizdi. Degenmen, bul baǵytta jumystar jalǵasa beredi. Moıynqum aýdanynyń ákimi Máden Musaev atalǵan ken ornynyń Almaty oblysynda tirkelgen kásiporyn ekenin, ol óńirde jumys istep turǵan óndiris orny bolǵandyqtan, salyq túsimi oblys qazynasyna túsýi úshin birqatar jumystar júrgizilgenin aıttty. Alaıda aýdan ákimi olardyń ujymdyq shart jasaý týraly talapty eskermeı otyrǵanyna toqtaldy. Berdibek Saparbaev Moıynqum aýdanyna kelesi jolǵy issaparynda atalǵan ken ornynyń basshylarymen arnaıy kezdesetinin jetkizdi. Sonymen qatar, oblys aýmaǵynda jumys isteıtin kez-kelgen óndiris orny, kásipkerlik nysan jergilikti atqarýshy organdardyń talaptaryn oryndaýy tıis ekenin eskertti.
Jambyl oblysy
