"Shapaǵat" arnaıy áleýmettik qyzmet túrlerin kórsetý ortalyǵynda 141 adam qamqorlyqqa alynǵan. Dál osy ortalyqtyń birneshe adamy koronavırýsqa shaldyǵyp emdelip shyqty. Qazirgi ýaqytta karantındik talaptar qatań saqtalýda. Arnaıy monıtorıngtik top beınebaqylaý kameralarynyń jetkiliksizdigin anyqtady. Atalǵan ortalyq dırektorynyń aıtýynsha, sıfrly beınebaqylaý kameralaryn ornatý úshin bıýdjetten 3 mln teńge bólingen. Qazirgi ýaqytta bul jumystardy atqarýǵa baılanysty kelissózder júrgizilýde.
"Ǵımaratymyz eski. 1968 jyly paıdalanýǵa berilgen. Osydan tórt jyl buryn kúrdeli jóndeý júrgizildi. 20 jyl boıy qańyrap bos turǵan klýbymyz bar edi, sony jańalaýǵa oblys bıýdjetinen 21 mln teńge bólinip, ony da qalypqa keltirip aldyq", deıdi ortalyq dırektory Sáken Jekebaev.
Arnaıy áleýmettik qyzmet túrlerin alýshylardyń quqyǵyn qorǵaý qashan da ózekti. Sondyqtan qoǵam belsendilerinen jáne memlekettik organ ókilderinen quralǵan monıtorıngtik top óńirdegi osyndaı mekemelerdiń jumysymen tanysýda. Arnaıy komıssııa anyqtaǵan kemshilikter jýyq arada sheshimin tabatyn bolady.
