Jańa ortalyqtyń ashylý saltanatyna Qaraǵandy qalasy ákiminiń orynbasary Nurlan Bıkenov, qalalyq jumyspen qamtý jáne áleýmettik baǵdarlamalar bóliminiń basshylyǵy, "Otbasy mektebi" qorynyń ókilderi jáne kóp balaly analar qatysty.
"Januıa" ortalyǵynda kóp balaly otbasy músheleri bilikti psıhologtardyń, zańgerler men áleýmettanýshylardyń kómegine júgine alady. Bul jerde densaýlyq saqtaý, bilim berý, jumysqa ornalastyrý, kásipkerlik, áleýmettik kómek kórsetý jáne turǵyn úı baǵdarlamalary máseleleri boıynsha keńes alýǵa mol múmkindik qarastyrylǵan.
Aıta ketetin bir jaıt, karantın sharttaryna baılanysty keńes alý aldyn ala jazylý boıynsha júrgiziledi. Ortalyqta aıyna bir ret AÁK berýden bastap, kóp balaly otbasynda ózara qarym-qatynas qurýdyń psıhologııalyq tásilderine deıingi aralyqty túrli taqyryptar boıynsha semınarlar ótkizip turý josparlanǵan.
Ortalyqtyń tusaýy saltanatty jaǵdaıda kesilgennen keıin, alǵashqy semınar ótip, "Turǵyn úı qurylys jınaq bankiniń" mamandary "Baqytty otbasy" memlekettik baǵdarlamasy boıynsha ıpotekany qalaı alý kerektigi jaıly egjeı-tegjeıli aıtyp berdi.
Eske salsaq, "Januıa" ortalyǵy Qaraǵandy qalalyq jumyspen qamtý jáne áleýmettik baǵdarlamalar bóliminiń qoldaýymen "Otbasy mektebi" qoǵamdyq qorynyń bastamasy boıynsha ashylyp, jumys isteı bastady.
