Aldaǵy dúısenbi kúni Almatydaǵy Balýan Sholaq atyndaǵy sport saraıynda bokstan álemniń XVII chempıonaty bastalady. Uzyn-yrǵasy 13 kún boıy ońtústik astananyń túńdigin jelpildetetin bul saıys qazannyń 26-sy kúni óz máresine jetedi.
Aldaǵy dúısenbi kúni Almatydaǵy Balýan Sholaq atyndaǵy sport saraıynda bokstan álemniń XVII chempıonaty bastalady. Uzyn-yrǵasy 13 kún boıy ońtústik astananyń túńdigin jelpildetetin bul saıys qazannyń 26-sy kúni óz máresine jetedi.
Qazaqstan burynǵy Keńes respýblıkalary ishindegi bylǵary qolǵap sheberleriniń jahandyq jarysyn qabyldap otyrǵan ekinshi el bolǵaly tur. Munyń aldynda ǵana mundaı saıystyń Ázerbaıjan astanasy – Baký qalasynda ótkeni belgili. Jalpy, keshegi keńestik kezeńdi qosa eseptegende, bul bizdiń aýmaqtaǵy úshinshi saıys bolyp tabylady. Olardyń birinshisi respýblıkalar áli Odaqtan enshilerin almaǵan 1989 jyly Máskeýde ótkizilgen bolatyn. Sodan beri bul qurmetke qol jetkizgen basqa postkeńestik memleket joq. Osynyń ózi Alataýdyń baýraıynda sharshy alańdy shaıqaıtyn básireli básekeniń bási qanshalyqty joǵary ekenin ańǵartsa kerek. Dál búgingi tańǵa munda kelýge 110 eldiń 567 boksshysy kelisim berip qoıdy. Ras, osynyń aldynda 116 elden 576 sańlaqtyń keletini týraly aqpar taraǵan bolatyn. Eger sol meje belgilense, ol osynyń aldyndaǵy Baký rıngindegi rekordtyń jańarǵanyn bildiretin edi. Al Hazar teńiziniń ıinindegi shaharda 2011 jyly 113 eldiń 570 boksshysy júldeli oryndar úshin jan berip, jan alysqan keskilesken shaıqastar ótkizgen. Biraq sońǵy sátte Almatyda planeta boksshylarynyń birinshi ret iri halyqaralyq jarysty shlemsiz, ıaǵnı qorǵanysh bas kıiminsiz ótkizetini túbegeıli sheshildi de, munda kelýge nıettilerdiń qatarlary sál de bolsa sırep qaldy.
Degenmen, bul chempıonat qatysýshy elderi men sportshylarynyń sany boıynsha eń úzdik kórsetkishke qol jetkizbegenmen, kóp jyldarǵy úzilisten keıin shaıqasty qaıtadan shlemsiz ótkizýdi bastaǵan doda retinde tarıhta qalatyn bolady. Onyń ústine, bul alamanǵa qatysýshy negizgi boks derjavalarynyń bári de ózderiniń qazirgi tańdaǵy eń kúshti quramdarymen kelgeli otyr. Munda ótken chempıonat pen London Olımpıadasynda júldeli oryndardan kóringenderdiń deni kelgeli tur. Mysaly, Kýbanyń Albıon jerinde chempıon atanǵan tarlandary Robeısı Ramıres pen Rosnıel Iglesıasty, sondaı-aq, ırland Lıýk Kempbelldi biz osynda da kóremiz. Ras, altyn medaldiń qalǵan ıegerleri bola qoımaıdy. Sebebi, bizdiń Serik Sápıev bul kezge deıin boksty aıaqtasa, Zoý Shımın (Qytaı), Rıoto Mýrata (Japonııa), Vasılıı Lomachenko, Aleksandr Ýsık (ekeýi de – Ýkraına), Entonı Djoshýa (Anglııa), Egor Mehonsev (Reseı) syndy chempıondar kásipqoılar sapyna aýysyp ketti.
Endi qazirgi Qazaqstan quramasy jóninde birer sóz. Ol túgelge jýyq bıyl Iordanııada ótken Azııa chempıonatyna qatysqan qurammen jasaqtaldy. Munda tek asa jeńil salmaqta (49 kg) qurlyq chempıony atanǵan Temirtas Júsipovti 2010 jylǵy Azııa oıyndarynyń kúmis júldegeri Birjan Jaqypov almastyrdy. Qalǵan salmaq dárejeleri boıynsha elimizdiń namysyn Amman rınginde atoı salǵan Ilııas Súleımenov (52 kg), Qaırat Erálıev (56 kg), Berik Ábdirahmanov (60 kg), Mereı Aqshalov (64 kg), Danııar Eleýsinov (69 kg), Jánibek Álimhanuly (75 kg), Ádilbek Nııazymbetov (81 kg), Anton Pınchýk (91 kg) jáne Ivan Dychko (+91 kg) qorǵaıdy.
Biz aldaǵy aptadan bastap gazet betinde osy chempıonat jaıly arnaıy toptamalar bere bastaımyz. Sonymen birge, birinshilik barysyndaǵy túrli jańalyqtardy egemennews.kz saıty arqyly saǵat saıyn derlik berip turatyn bolamyz.
Iske sát, jigitter!
Serik PIRNAZAR,
«Egemen Qazaqstan».
