Qazaqstanda egin orý naýqanyna daıyndyq bastaldy

2020 jyly zııankestermen kúresýge respýblıkalyq jáne jergilikti bıýdjetten 1,5 mıllıardtan astam qarjy bólindi. Jándikterdiń taralý oshaqtaryn anyqtaý úshin myńnan astam maman tartyldy. GPS navıgatorlary jáne trekerleriniń kómegimen shamamen 40 mln ga aýylsharýashylyq jerlerin baqylaý júrgizildi. Hımııalyq óńdeýge 150-ge jýyq arnaıy tehnıka - áýe kemesi men jeńil ushaqtar, shashyratqyshtar jáne aerozoldik gaz generatorlary jumyldyryldy.

Qazirgi ýaqytta Jambyl jáne Túrkistan oblystarynda marokkalyq shegirtkelerge qarsy hımııalyq óńdeý aıaqtaldy, al ıtalıandyq prýs jáne azııalyq shegirtkelerdi joıý jumystary aıaqtalýǵa jaqyn. Sonymen qatar, turaqsyz shegirtke zııankesterimen kúres jumystary úzdiksiz atqarylýda.

«Hımııalyq óńdeý ońtaıly ýaqytta joǵary bıologııalyq tıimdilikpen júzege asyrylady. Mamandardyń daıyndalýy jáne olardyń jumysyn tıimdi úılestirý nátıjesinde aýylsharýashylyq daqyldaryna zııan keltirý, sondaı-aq kórshiles elderdegi shegirtke zııankesteriniń bizge qaraı ótýi baıqalmaıdy», - dedi A. Saparov.

Birinshi vıse-mınıstr egin jınaýǵa qyzý daıyndyq  júrip jatqanyn habarlady. Atap aıtqanda, elevatorlar men astyq qoımalaryn daıyndaý jumystary bastaldy.

Respýblıkada 189 lısenzııalyq astyq qabyldaý kásiporny bar, olardyń jalpy syıymdylyǵy shamamen 12,4 mln. tonna. Budan basqa, AShTО́ jáne lısenzııasy joq astyq qabyldaý nysandary 14,7 mln. tonna astyqty saqtaý múmkindigine ıe. Osylaısha, astyqty saqtaýdyń jalpy kólemi 27 mln. tonnadan asady.

«Qazirgi ýaqytta barlyq lısenzııalanǵan astyq qabyldaý kásiporny elevatorlardyń materıaldyq-tehnıkalyq bazasyn daıyndaýǵa kiristi. Astyq tazartqysh mashınalardyń, astyqty keptirýge arnalǵan jabdyqtardyń daıyndyǵyna jáne zııankesterden zalalsyzdandyrý sharalaryn júzege asyrýǵa erekshe kóńil bólinedi», - dedi Aıdarbek Saparov.

Vıse-mınıstrdiń aıtýynsha, eldiń ońtústik óńirleri egin jınaýǵa kiristi. Kartop, kókónister, baqsha daqyldary men kúzdik daqyldar jınalýda. Qazirdiń ózinde 93 myń tonna bıdaı jáne 26 myń tonna arpa jınaldy.

«QazAgro» holdınginiń habarlaýynsha, ústimizdegi jyldyń 6 aıynda agroónerkásiptik keshendi nesıeleýge 211 mıllıard teńge bólingen. Atap aıtqanda, kóktemgi egis jáne egin jınaý jumystaryn nesıelendirýge 82 mlrd. teńge, aýylsharýashylyq tehnıkalaryn jańartýǵa 48 mlrd.teńge bólindi, sonymen qatar jalpy quny 5,8 mlrd.teńgege 10 iri ınvestısııalyq joba engizildi.

«Eńbek» memlekettik baǵdarlamasy aıasynda 17 mlrd. teńgege 4 myńnan astam mıkrokredıt berildi, onyń jartysyn aýyl kásipkerleri aldy.

Birinshi jartyjyldyqta Holdıngtiń jumysynyń nátıjesinde aýyldarda 3,8 myń jumys orny quryldy.

Memleket basshysynyń tapsyrmasymen Holdıng óz qyzmetin ońtaılandyrý boıynsha belsendi jumys júrgizýde: enshiles uıymdardyń sany jetiden úshke deıin qysqartyldy.

Sondaı-aq, fermerlerdiń ótinishi boıynsha kepil saıasatyna qoıylatyn talaptar jetildirildi. Endi olardyń qamtamasyz etilýi ótimdiliktiń eń joǵary koeffısıentimen baǵalanady. Sonymen birge, Aýyl sharýashylyǵyn qarjylaı qoldaý qory kepilge qoıylǵan jerlerge jáne basqa múlikke ótimdilik koeffısıentterin arttyrdy, bolashaqta qaryz alýshynyń menshigine aınalatyn kepilge qoıylǵan múlikti qabyldaıdy.

Pandemııadan zardap shekken qaryz alýshylarǵa keıinge qaldyrylǵan tólem usynylady. 9,5 mlrd.teńge somasyna 3378 qaryz alýshynyń keıinge qaldyrý ótinishi maquldandy. Bul aýyldyq jerlerde 9 myńnan astam jumys ornyn saqtap qalýǵa múmkindik berip otyr.