Irgesi 1908 jyly qalanǵan ǵımarattyń balalar ádebıeti bólimi (Lýnacharskıı kóshesi, 9/2 úı) jarty ǵasyrdan astam ýaqyt jóndeý kórmegen.
Oblystyq kitaphananyń basshysy Sholpan Shahmetovanyń aıtýynsha, maýsym aıynyń 15-nen beri merdiger kompanııa "Kúmbez" JShS kúrdeli jóndeýjumystaryn bastaǵan.
"Balalar ádebıeti bólimine kúrdeli jóndeý júrgizý meniń basshylyqqa kelgen ýaqytymnan beri qolǵa alǵan sharýalarymnyń biri boldy", - deıdi Sholpan Shahmetova. - Ǵımarattyń ishki-syrtqy qabyrǵalary jarylyp, tóbesinen sý aǵa bastaǵan soń jaýapty mekemelerge jóndeý jumystary týraly qanshama ret ótinish berdik. Negizi ǵımaratqa 2004 jyly kosmetıkalyq jóndeý jumystary júrgizilgen. Degenmen, ǵasyrdan asa tarıhy bar ǵımarattyń sý, jylý, jaryqtandyrý júıesindegi aıtarlyqtaı máselelerdi sheshý úshin kúrdeli jóndeýdiń kerektigi aıdan anyq edi. Sol sebepten 2017 jyly maýsym aıynda "Kúmbez" JShS-men 2 mln 589 myń teńgege jobalyq-smetalyq qujattamalary jasalǵan bolatyn. Dál osy jyldyń qyrkúıek aıynda memlekettik saraptamadan óttik. Qazynadan qarjy bólinisimen birden, 2020 jyldyń maýsym aıynan kúrdeli jóndeýdi bastap kettik. Jobanyń jalpy sommasy 136 mln 219 myń teńgeni quraıdy.
Merdigerlik uıymnyń basshysy Vıktor Degtıarevtyń sózinshe, bólingen aqsha, ýaqytyly tıimdi jumsalyp, barlyq jumys josparǵa saı júrgizilip jatqan kórinedi.
"Qazir jumystyń bastapqy kezeńindemiz. Ishki jáne syrtqy jumystar qatar jasalýda. Kitaphana tóbeleri jóndelip, qabyrǵalary tegistelýde. Josparǵa sáıkes keıbir qabyrǵalar alynyp, sonyń negizinde kitaphana ishi keń ári jaryq qalypqa enýde. Aldaǵy ýaqytta jylý, jaryq júıeleri qalypqa keltiriledi. Esik-terezeler aýystyrylyp, edenderi jańartylady. Eń sońynda ákteý-syrlaý jumystaryn jasaımyz",– deıdi jaýapty maman.
Oblysymyzdaǵy birden-bir rýhanı azyq ordasy sanalatyn – balalarǵa arnalǵan basty kitaphananyń jaǵdaıynyń óte múshkil haline kitaphana qyzmetkerlerinen bólek, oqyrman qaýym da beı-jaı qaramaıdy. S.Toraıǵyrov atyndaǵy PMÝ professory Jeńis Mananbaev bastaǵan zııaly qaýym ókilderi oblys ákiminiń blogyna hat ta jazǵan bolatyn. Bul másele bes nemeresin jetektep aptasyna eki-úsh ret kitaphanaǵa bas suǵatyn, QR bilim berý úzdigi, Qazaqtan jýrnalıster odaǵynyń múshesi Ersin Taqyrbasovty da qatty alańdatqan.
"Rýhanı bilimniń, rýhanı mádenıettiń ordasy kitaphana bolatyn bolsa, al adamnyń jan azyǵy kitap bolyp tabylady. Kitappen dos bolǵan adamnyń oı-órisi keń, sóz mádenıeti joǵary, sanaly jan-jaqty bolyp tárbıeleneri sózsiz. Sondyqtan meıilinshe, nemerelerimdi kitaphanaǵa ákelýge tyrysamyn. 1-synypty endi attap kitap oqýdy bastap kele jatqan nemerelerime jeńil ertegi, áńgimelerdi oqýǵa usynamyn. Olar keıde sýret te salady. Al úlkenderine kúrdelirek taqyryptardy usynamyn. Osy turǵyda kitaphana qyzmetkerlerine alǵysymdy bildirmekpin. Izdegen kitaptarymyzdy taýyp berip, nemerelerimmen sýret salyp, árdaıym jaǵdaıymyzdy jasaıdy. Kitaphanaǵa kúrdeli jóndeý jasalyp jatqandyǵyn estip, kitaphanashylardan kem qýanǵan joqpyz. Mádenı-aǵartýshylyq mekemeniń aıanyshty háli meniń de kóńilimdi kúpti etken edi. Buǵan deıin kitaphanada balalardyń emin-erkin kitap oqyp, bos ýaqyttaryn tıimdi ótkizýine tolyqqandy múmkindik joq-tuǵyn. Ásirese, birinshi qabatyndaǵy kógergen qabyrǵalardyń jaǵymsyz ıisi qolqańdy qabatyn edi. Ázirge kitaphananyń áleýmettik jelilerindegi is sharalarǵa belsene aralasýdamyz. Jaqynda "Ájeler ertegileri" jobasyna qatystyq. Degenmen ózimiz baryp, qatysqanǵa jetpeıdi. Úı-ishimizben jóndeýdiń tolyq bitkenin asyǵa kútýdemiz", – deıdi Ersin Qasqıuly.
Sholpan Shahmetova kúrdeli jóndeý bitisimen kitaphanamyzda ózgerister kóp bolatynyn aıtady. Bastaýysh synyp oqýshylary men mekteptke deıingi balalarǵa arnap, jańa tanymdyq oıyn ortalyǵy ashylmaq. Munda kitaphanashylar balalarmen applıkasııa, skrapbýkıng, kvıllıng, sýret salý sııaqty jumystar ótkizetin bolady. Sonymen qatar jergilikti fotograf nemese kórkem sýretshilermen jıyndar ótkizilmek. Kitaphanadaǵy leksııa zaly kınoteatr men konferensııa zalynyń mindetin qosa atqarady. Sondaı-aq aqyn-jazýshylarmen kezdesýler, ádebı keshter, konferensııalar ótkiziletin bolady. Kovorkın ortalyǵy da óz jumysyn jalǵastyrady.
Kúrdeli jóndeý jumystary aǵymdaǵy jyldyń sońynda aıaqtalyp, 2021 jyly balalarǵa arnalǵan kitaphana oqyrmandar úshin tolyq paıdalanýǵa berilmek.
