9 shilde kúni Taraz qalasynda "Zańsyz kólik turaǵy" jedel-aldyn alý is-sharasy bastaldy, oǵan oblys ortalyǵynyń Polısııa basqarmasy patrýldik polısııa batalonynyń qyzmetkerleri men evakýator qatysty.
Jedel aldyn alý is-sharasynyń birinshi kúni polısııa qyzmetkerleri kólik kóp júretin jol ýchaskelerine, onyń ishinde Baýyrjan Momyshuly kóshesindegi "Qaıqarmet" bazarynyń jáne "Dıana" saýda ortalyǵynyń janynda, Qazybek bı kóshesiniń boıyndaǵy "Sentralnyı" gastronomynyń aldyndaǵy jol ýchaskelerine nazar aýdardy. – Qala turǵyndary kóbinese áleýmettik jelilerde osy ýchaskelerde zańsyz qoıylǵan kóliktiń saldarynan kólik keptelisi men joldyń tar bolýyna shaǵymdanady, – dep atap ótti Taraz qalasy Polısııa basqarmasynyń bastyǵy Asylhan Zaýrbekov.
Sondaı-aq quqyq qorǵaý qyzmetkerleri kóp qabatty úılerdiń aýlalaryndaǵy gúlzarlarǵa, balalar men sport alańdaryna, basqa da ınfraqurylym nysandaryna kólikterdi zańsyz qoıý derekterin tekserdi.
Nátıjesinde, bir táýlik ishinde QR ÁQBtK-niń 597-baby "Avtokólik quraldaryn toqtatý nemese turý erejelerin buzý" boıynsha 30 adam ákimshilik jaýapkershilikke tartyldy. Jalpy, aǵymdaǵy jyldyń alty aıynda atalǵan bap boıynsha oblysta 514 buzýshylyq anyqtaldy. "Zańsyz kólik turaǵy" jedel-aldyn alý is-sharasy jalǵasyp jatyr.
