Sýret elorda ákimdiginiń baspasóz qyzmetinen alyndy
Elordalyq 22 kolledjge 2020-21 oqý jylyna arnalǵan memlekettik bilim berý granty (12 memlekettik, 10 jeke menshik) 4 652 orynǵa bólindi. Onyń ishinde jergilikti bıýdjet esebinen – 3 602 oryn, nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan "Eńbek" memlekettik baǵdarlamasy boıynsha – 1050 oryn qarastyrylǵan.
"Tapsyrys ekonomıkanyń mynadaı salalary arasynda bólinedi: bilim – 865, medısına, farmasevtıka – 250, óner jáne mádenıet – 165, geologııa – 25, servıs jáne qyzmet kórsetý, marketıng – 1000, energetıka – 200, kólik – 245, óndiris, montajdaý, tehnıkalyq qyzmet kórsetý jáne jóndeý – 725, baılanys, telekommýnıkasııa jáne aqparattyq tehnologııalar – 700, qurylys, kommýnaldyq sharýashylyq, ekologııa – 477", dep habarlady qalalyq bilim basqarmasy.
2020-21 oqý jylynda memlekettik tapsyrys aıasynda 13 mamandyq boıynsha 139 orynǵa erekshe bilim berýge qajettiligi bar balalardy qabyldaý josparlanyp otyr. TjKB mamandaryn daıarlaýǵa memlekettik bilim berý tapsyrysyn ornalastyrý týraly aqparat bilim basqarmasynyń http://bilim.astana.kz resmı saıtynda jarııalanǵan.
TjKB uıymdarynyń 2020-21 oqý jylyna qabyldaý jospary 8 myń adamdy quraıdy. Kolledjderge qujat qabyldaý 20 maýsymnan 25 tamyzǵa deıin (jumysshy kadrlar úshin 27 tamyzǵa deıin) egov.kz elektrondy úkimet veb-portaly arqyly júzege asady. Sondaı-aq sanıtarlyq-epıdemıologııalyq normalardy saqtaı otyryp, kolledjdiń qabyldaý komıssııasy arqyly qaǵaz túrinde qabyldanady.
"Talapkerlerge TjKB uıymdaryna qujat tapsyrý kezinde medısınalyq anyqtamalardy (№ 086-Ý, I jáne II toptaǵy múgedekter men bala jasynan múgedekter úshin 088-Ý nysany boıynsha medısınalyq-áleýmettik saraptama qorytyndysyn), odan keıingi merzimde – oqý jyly bastalǵanǵa deıin usynbaýǵa ruqsat etiledi. Memlekettik tapsyrys boıynsha oqýǵa baıqaý attestattyń jıyntyq baly negizinde ótkiziledi", dedi bilim basqarmasy ókilderi.
