Jańǵyrtý jumystaryn atqaryp jatqan mekeme «Qazqaıtajańartý» RMK basshylarynyń aıtýyna qaraǵanda, mundaǵy nysandar tanymdyq jáne rýhanı týrızm úshin óte qolaıly. Sol sebepti, qoryq-mýzeıdi jańǵyrtýdyń 2019-2021 jyldarǵa arnalǵan jospary qolǵa alynyp otyr. Sonymen qatar jańǵyrtý isimen birge arheologııalyq qazba jumystary da josparǵa sáıkes júzege asyrylatyn kórinedi.
Qazirgi tańda keshendi ǵylymı, restavrasııalyq jumystar nátıjesinde Qoja Ahmet Iаsaýı kesenesiniń Qazandyq, Úlken Aqsaraı, Qabirhana, Qudyqhana bólmelerin aqtaý qyzmeti qarqyndy júrgizilse, kesene kúmbezi, Qazarma, Rabııa Sultan Begim kesenesi, Shyǵys monshasy, Juma meshiti, Darbaza qaqpasy, Han meshiti, Jeti ata qaqpasy, Qylýet jer asty meshitterinde restavrasııalaý jumystary da jalǵasyn tabýda.
Aldaǵy ýaqytta XI-XII ǵasyr úlesindegi 40 meshitten qazirgi zamanǵa jetken jalǵyz oryn Juma meshiti mıhrabymen birge tolyǵymen jańǵyrtylyp jáne onyń aǵash bastyrmasyn keńeıtý jumystary josparlanǵan. Qazirgi tańda meshittiń ońtústik-shyǵys qabyrǵalaryna demontaj jumystary júrgizilýde.
Sonymen qatar XI-XII ǵasyrǵa tán Qylýet jerasty meshitin qaıta jańǵyrtý barysynda ǵımarattyń negizgi salmaq túsetin qurylymdary men jerasty qurylysynyń irgesin keńeıtý jumystary jasalýda. XV ǵasyrdyń tarıhı jádigeri – ortaǵasyrlyq shyǵys monshasy men kúmbezdiń juqa qabatyn, ıntererin restavrasııalaý, ekinshi esikti salý jáne irgeles aýmaqty abattandyrý josparda bar eken.
Al sáýlettik ǵımarat Qazarmaǵa 2000 jyldan beri kúrdeli jóndeý jumystary júrgizilmegen bolatyn. Qazirgi tańda onyń shatyryn tolyǵymen aýystyrý jumystary júzege asty.
