COVID-19 pandemııasyna baılanysty aǵa býyn ókilderine koronavırýs juqpasyn boldyrmaý úshin úıde bolý usynylǵany belgili.
Bul joly eriktiler jeke úıde turatyn zeınetkerge baryp, kókónis baqshasyn ashýǵa kómektesip, aýlany qoqystan tazartty.
"Osy qıyn-qystaý kezeńde, ásirese aǵa býyn, jalǵyzbasty adamdar kómek pen qoldaýdy qajet etedi. Olar úshin kóńil bólý mańyzdy, biz bul jumysty jalǵastyramyz. Sonymen qatar biz medısına mamandaryna kómektesýge tyrysamyz. Buǵan bizge kásipkerler járdemdesedi. Jaqynda bir kásipker 70 lıtr qymyz berdi, endi biri 300 medısına qyzmetkerin tamaqtandyrýǵa daıyn", deıdi #Birgemiz ulttyq jobasynyń eriktisi Sultan Allabergenov.
Batyrjan – múgedektigi baryna qaramastan eriktiler qataryna qosylyp, qala turǵyndaryna kómek kórsetip júrgenderdiń biri.
"Men koronavırýspen kúresýge óz erkimmen qosyldym. Jerlesterimnen karantın talaptaryn qatań saqtaýdy suraımyn: maska taǵý, antıseptık qoldaný, áleýmettik qashyqtyq saqtaý keregin eskertemin", deıdi ol.
Sonymen qatar eriktiler elordalyq kásipkerlermen birge 100 dárigerge tegin qymyz taratýdy uıymdastyrdy. Qymyz shól basyp, deneni qýattandyrady. Halyqtyq medısınada ol avıtamınoz úshin qoldanylady. Sýsynnyń quramynda V dárýmeni, askorbın qyshqyly jáne amın qyshqyldary bar. Barlyq berilgen qymyz zerthanalyq tekserýden ótti.
Sonymen birge, Qazaqstannyń astanasynda karantın tártibin saqtaý boıynsha reıdter jalǵasýda. Oǵan polısııa qyzmetkerlerimen birge eriktiler de qatysady. Sońǵy reıd barysynda 15 zań buzýshylyq anyqtaldy.
