Álem • 27 Shilde, 2020

Qytaıda AQSh-tyń Bas konsýldyǵy jabyldy

46 ret kórsetildi

Qytaı tarapynyń talaptaryna sáıkes, AQSh-tyń Chendý qalasyndaǵy Bas konsýldyǵy resmı túrde jabyldy. Bul týraly Qytaıdyń Syrtqy ister mınıstrligi málimdeıdi, dep jazady Egemen.kz

"2020 jyldyń 27 shilde kúni saǵat 10.00-de (Nur-Sultan ýaqytymen 08.00-de) Qytaı tarapynyń talaptaryna sáıkes, AQSh-tyń Chendý qalasyndaǵy Bas konsýldyǵy jabyldy", delingen QHR SIM saıtynda jarııalanǵan málimdemesinde.

Budan keıin Qytaıdyń quzyrly organ ókilderi Bas konsýldyqty óz qaramaǵyna aldy.

Chendýde AQSh-tyń Bas konsýldyǵy 1985 jyly ashylǵan. Ol eldiń ońtústik-batysyna, sonyń ishinde Sychýan, Iýnnan provınsııalaryna, Gýıchjoý, Tıbet avtonomdy aýdanyna, sondaı-aq Chýnsın ortalyqtaǵy baǵynyshty qalasyna jaýapty edi.

AQSh 21 shilde kúni Qytaıdan Hıýstondaǵy bas konsýldyqty jabýdy talap etti. Qytaı bıligi bul sheshimdi saıası arandatýshylyq dep atady jáne jaýapty áreketter qabyldaıtynyn málimdedi. AQSh Memlekettik departamentiniń resmı ókili Morgan Ortagýs Vashıngton amerıkalyqtardyń zııatkerlik menshigi men jeke aqparattaryn qorǵaýdy qamtamasyz etý úshin Hıýstondaǵy Qytaıdyń Bas konsýldyǵyn jabýdy tapsyrdy.

Alyptar teketiresi toqtamaq emes. Sebebi 24 shildede QHR SIM Sychýan provınsııasynyń Chendý qalasyndaǵy AQSh-tyń Bas konsýldyǵy óz qyzmetin toqtatýdy talap etti. Syrtqy saıası vedomstvo QHR-nyń Chendýdegi amerıkandyq dıplomatııalyq ókildikti jabý týraly talaptaryn zańdy jáne qajetti jaýap dep atady. Qytaı bıligi eldiń syrtqy isterinde týyndaǵan jaǵdaı úshin barlyq jaýapkershilikti Vashıngton tolyǵymen óz moınyna alýyn talap etedi.

Sońǵy jańalyqtar

Uqsas jańalyqtar