Aýdan ákimi Muhtar Orazbaev aýrýhanaǵa qajetti zattardy alýǵa qomaqty qarjy bólip, demeýshilik jasaǵany úshin "Araltuz" AQ prezıdenti Aıdynbek Taýasarovqa aýdan halqynyń atynan alǵysyn jetkizdi. Sonymen qatar, aýdan basshysy el saýlyǵy úshin qyzmet etip júrgen aq halatty jandardyń jumystaryna tabys tiledi.
Araltuz AQ men "Aralsoda" JShS bólgen 50 mıllıon teńge kólemindegi aqshalaı qarajatqa aýdandaǵy provızorlyq stasıonarlarǵa qajetti medısınalyq quraldar men jabdyqtar alyndy.
Qaıyrymdylyq kómek aıasynda 23 ottegi konsentraty, 200 medısınalyq tósek pen 400 tósek oryn jabdyǵy, 200 medısınalyq qorǵanys quraly men maska jıyntyqtary tabys etildi.
Kómek kórsetýdiń kelesi kezeńinde aýdanaralyq aýrýhanaǵa 2 jedel járdem mashınasy, 100-den astam gaz ballon, sáýlelendirgish, medısınalyq fýnksıonaldy tósek beriletin bolady.
Aıtyp óteıik, aýrýhanaǵa berilgen tósek jabdyqtarynyń barlyǵy "Aral qalasy boıynsha múmkindigi shekteýli múgedekterdi qoldaý men qorǵaý birlestiginiń" tóraıymy Indıra Jumashevanyń tigin sheberhanasynda tigilgen.
Medısınalyq quraldardy tabystaý sátinde "Araltuz" AQ prezıdenti Aıdynbek Taýasarov: "Biz bárimiz de Qazaqstanda turyp, jumys istep jatyrmyz. Bul bizdiń úıimiz. Osynda meniń jaqyndarym, meniń balalarym ómir súredi. Áleýmetik jaýapty kompanııanyń basshysy retinde qazirgideı sátte men de ujym da qalys qala almaımyz. Sondyqtan da aýdandyq aýrýhana úshin medısınalyq jabdyqtardy satyp alýǵa sheshim qabyldadyq. Kompanııa Aral turǵyndaryna barynsha qoldaý men kómek kórsetýge tyrysýda",- dep atap ótti.
