Oblystyń Jaqsy, Jarqaıyń, Atbasar jáne Esil aýdandary dándi-daqyldar ósirýge óte qolaıly óńirler. Mamandar aımaqta egin oraǵyna daıyndyq jumystary pysyqtalǵanyn, sondyqtan janar jaǵarmaıǵa qatysty másele bolmaýǵa tıis ekenin aıtýda. Senator ónimdi jınaý kezinde jumysshylardyń qaýipizdigi úshin sanıtarlyq talaptardy saqtaýdyń mańyzdy ekenin aıtyp, jergilikti bılik pen sharýalardy osy máselege basa mán berýge shaqyrdy.
Qazirdiń ózinde oblystyń keı óńirinde egin oraǵy bastalyp ketken. Oblystyq aýyl sharýshylyǵy basqarmasy basshysynyń aıtýynsha, óńir boıynsha egin egilgen jerdiń 63 paıyzy qanaǵattanarlyq jaǵdaıda. Jazda jaýyn-shashynnyń az bolýy keı alqaptarǵa zardabyn tıgizgen. Jaýǵan burshaqtyń saldarynan búlingen alqaptar da bar. Senator ádette mundaı jaǵdaıda mol ónim bolmaıtynyna nazar aýdaryp, bıylǵy bitik egindi erekshe qubylysqa balady.
"Bıyl memleket tarapynan óńirlerde aýyl sharýashylyǵyn damytý úshin aıtarlyqtaı qarajat bólindi. Byltyr atalǵan qarajat 60 mıllıard teńge shamasynda bolsa, 2020 jyly 70 mıllıard teńgeden astam qarjy qarastyrylǵan. Endi osy qarajatty tıimdi paıdalanyp, egindi shashaýyn shyǵarmaı jınap alýymyz kerek", dedi senator.
Rashıt Ákimov oblys ákimimen kezdesýinde óńirdiń áleýmettik-ekonomıkalyq damý máselesin talqylady. Sondaı-aq, Qazaqstan-Reseı óńiraralyq yntymaqtastyǵynyń XVII forýmy aıasynda qolǵa alynǵan jobalardyń iske asyrylý barysyn pysyqtady. Budan basqa, depýtat oblys ortalyǵynda salynyp jatqan oqýshylar saraıy men kóp páterli turǵyn úıdiń jaı-kúıimen tanysyp, shahardyń ınjenerlik ınfraqurylymyna kóńil bóldi.
