Kezdesý barysynda qala basshysy Syr sportyna eńbegi sińgen jattyqtyrýshylar men baıraqty básekeden oljaly oralǵan jerlesterimizge alǵysyn bildirdi.
Shahar basshysy bıylǵy jyly qala sportshylarynyń halyqaralyq, respýblıkalyq dodalarda jetken jetistikterine toqtalyp, qaladaǵy sport salasynyń áleýetin arttyrýǵa baǵyttalǵan jarqyn jobalardyń júzege asyrylyp jatqanyn aıtty.
Máselen, búgingi kúni «Jumyspen qamtý jol kartasy» baǵdarlamasy aıasynda qala aýmaǵynda sport salasyna baılanysty 10 joba júzege asyrylýda.
Onyń ishinde, 4 oblystyq sport mektepterine aǵymdaǵy jóndeý, «Lokomotıv» stadıonynyń fýtbol alańyna qaıta jańǵyrtý jumystary jáne baıdarka men kanoe esý bazasynyń, 33 oıyn-sporttyq alańynyń qurylys jumystary júrgizilýde.
Osy jyly Birqazan eldi mekeni, Aqsýat, Aqjarma, Qosshyńyraý aýyldyq okrýgterinde dene shynyqtyrý alańdaryn salýǵa qalalyq bıýdjetten qarjy bólinip, qurylys jumystary júrgizilýde.
Aldaǵy ýaqytta Tasbóget kentinen salynatyn dene shynyqtyrý-saýyqtyrý kesheniniń joba-smetalyq qujattaryn ázirleý men memlekettik saraptamadan ótkizýge qarjy qaralǵan. Basqosýda QR Eńbegi sińgen jattyqtyrýshy Vıacheslav Kım men sala ardageri Altynbek Jańabekov Syr sportyna kórsetilgen qoldaýdyń aıryqsha ekenin aıtyp, qala basshysyna alǵysyn bildirse, jas sportshy Aıbar Qajymuqan Abaı óleńinen úzindi oqydy.
Kezdesý sońynda sala ardageri Altynbek Jańabekovke QR Mádenıet jáne sport mınıstrliginiń «Dene shynyqtyrý men sportty damytýǵa sińirgen eńbegi úshin» tósbelgisi tabystalyp, eńbegi sińgen jattyqtyrýshysy Vıacheslav Kım, halyqaralyq dárejedegi sport sheberleri Kabıra Asqarova, Islam Salımov, áıelder arasynda dzıýdon qazaqtan shyqqan tuńǵysh Azııa chempıony Jamal Bozova, qazaq eliniń tarıhynda alǵash ret baıdarka jáne kanoe esýden jasóspirimder Olımpıadasynyń jeńimpazy Dıas Bahraddın, karate-dodan halyqaralyq týrnırlerdiń júldegeri, jas sportshy Aıbar Ǵalymjan qala ákiminiń arnaıy alǵys hatymen marapattaldy.
