Brıfıng barysynda QR Syrtqy ister mınıstriniń orynbasary Erjan Ashyqbaev «KazAID» qurý qajettiligi týraly egjeı-tegjeıli aqparattandyryp, osy qurylymdy qurýdyń mindetteri men kútiletin paıdasy týraly habardar etti. Atap aıtqanda, damýǵa resmı kómek qaıyrymdylyq emes ekendigi atap ótildi. Bastapqy kezeńde jobalardy iske asyrýǵa memlekettik bıýdjetten qarajat bólý kózdelmeıdi. Agenttiktiń qyzmeti tıisti halyqaralyq qurylymdar arqyly bólinetin donor elderdiń qarajatyn tartýdy kózdeıtin úshjaqty halyqaralyq áriptestikke (KazAID – donor - benefısıar el) shoǵyrlandyrylatyn bolady. Brıfıngke qatysqan BUUDB men Túrik halyqaralyq yntymaqtastyq agenttiginiń (TIKA) ókilderi qurylyp jatqan qazaqstandyq analogpen jumys baılanystaryn jolǵa qoıý nıetin bildirip, birlesken jobalardy iske asyrýǵa shaqyrdy.
Bólingen qarajat barynsha Qazaqstanda ıgerilýi úshin jobalardy iske asyrýda qazaqstandyq kompanııalardy, mamandar men jabdyqtardy tartylatýǵa basymdylyq beriletini atap ótildi. Qazaqstandyq dıplomattyń aıtýynsha, agenttiktiń qyzmeti halyqaralyq uıymdarmen yntymaqtastyqtyń ozyq tájirıbesin tartýǵa, mamandarymyzdyń biliktiligin arttyrýǵa, taýarlar men qyzmetter sapasynyń álemdik standarttaryn engizýge, sondaı-aq otandyq eksportty sheteldik naryqtarǵa shyǵarýǵa járdemdesýge baǵyttalǵan.
Brıfıngke qatysqan BUU-nyń Qazaqstandaǵy Turaqty úılestirýshisi Norımasa Shımomýra qazaqstandyq bıliktiń bastamasyn quptap, onyń resmı kómekti damytý jónindegi BUU sheńberindegi normatıvtik qujattar men is-qımyl josparlaryna tolyq sáıkestigin atap ótti. N.Shımomýra Ortalyq Azııa óńirindegi turaqtylyq pen Turaqty damýdy nyǵaıtý turǵysynda agenttik qyzmetin iske qosýdyń erekshe ózektiligin atap ótti.
L.N.Gýmılev atyndaǵy Eýrazııa ulttyq ýnıversıteti zamanaýı zertteýler ınstıtýtynyń dırektory Muhıt-Ardager Sydyqnazarov jınalǵandardyń aldynda táýelsiz sarapshy retinde sóz sóılep, ózara kómek kórsetýdiń mańyzdylyǵy týraly naqty mysaldar keltirdi.
M.Sydyqnazarovtyń pikirinshe, pandemııaǵa qaramastan, álem elderi ózderiniń ulttyq múddelerine sáıkes belsendi ózara is-qımyldy jalǵastyrýda. «Árbir elge qoldaý men kóńil bólý qazir eki ese qajet, jáne mundaı qoldaý kórsetkender uzaq ýaqyt este qalady. Barlyǵy qarapaıym adamdardyń ómirindegideı: qıyn kezeńde kómektesseń, sizdi kóptegen jyldar boıy, tipti urpaqtary da rızashylyqpen eske alady jáne jaqsy kóredi», - dep atap ótti M.Sydyqnazarov.
Brıfıng barysynda Qazaqstannyń syrtqy saıası vedomstvosynyń ókilderi buqaralyq aqparat quraldary men qoǵamdy mazalaǵan ózekti suraqtarǵa jaýap berdi.
