Qoǵam • 22 Tamyz, 2020

Alty adamnyń ómirin arashalaǵan sportshy

366 ret kórsetildi

Keshe Mádenıet jáne sport mınınstrligi Sport dáne deneshynyqtyrý isteri komıtetiniń baspasóz ókili habarlasty. Aıtpaǵy: jýyqta Almaty qalasynda órt bolyp, tosynnan kelgen apat saldarynan aýyr jaǵdaıǵa dýshar bolǵan alty adamdy Dáýren Rysqulov degen azamat janyn jaldap júrip qutqaryp qalypty. Qysqasy, osy oqıǵany oqyrmandaryńyzǵa jetkizseńiz deıdi ǵoı...

Batyr jigit tanymal sportshy eken. Naqtyraq aıtqanda, aýyr atletıkadan elimizdiń birneshe dúrkin chempıony jáne halyqaralyq týrnırlerdiń júldegeri, sonymen qatar álem hám qurlyqtyq birinshilikterge qatysqan. О́tken jyldary Vengrııa astanasy Býdapesht qalasynda aýyr atletıkadan ótken jastar chempıonattynda qola medalǵa qol jetkizgen... taǵysyn taǵy.

Komıtet ókiliniń ótinishi boıynsha, búginginiń batyry Dáýren Amankeldiulymen habarlasqanymyzda: "Keshki as ústinde otyr edim, syrtta aıqaı-shý kóterildi. Bireýlerdiń "órt shyqty" degen ashy daýysy estildi. Dalaǵa júgirip shyqsam, úıdiń úshinshi qabaty órtenip jatyr eken. Ańdasam ápkemniń qyzy órt ishinde qalyp qoıypty. Júgirip kirsem, podezdiń ishi kók tútin. Eshteme kórinbeıdi. Qaıta syrtqa shyǵyp fýtbolkamdy sýlap aldymda joǵary kóterildim. Úshinshi qabatqa kelsem, laýlaǵan órt. Qyzyl jalyn bet qaratar emes. Eptep esikti jaýyp úlgerdim. Buryn órt qaýipsizdigi boıynsha ótken sabaqtar esime túsip, jerge jata qalyp, eńbekteı bastadym. Qaryndasym bólmesinde jaryq janyp turǵanyn baıqadym", deıdi sportshy baýyrymyz.

Sodan órt jaılaǵan bólmege kirse jıen qaryndasy joq. Keıin belgili bolǵandaı, ol balkonǵa shyǵyp ketken eken. Dáýren qyzyl jalynmen arpalasyp júrip qyzdy qutqaryp shyǵady. Endi "ýh" deı bergende daladaǵy adamdardyń "tórtinshi qabatta balalar qalyp qoıdy", dep zar ılegen daýysyn estıdi. Batyr azamat qyzyl jalyndy tilip ótip tórtinshi qabatqa jetedi. Esikti teýip ashyp ajal aýzynda úrpıip turǵan tórt bala men anasyn qutqarady. Sol sátte basqa azamattarda kómekke kelip úlgergen kórinedi.

"Ákege tartyp ul týady" degendeı Dáýrenniń ákesi Amangeldi Rymqulov aýyr atletıkadan KSRO sport sheberi, Qazaqstannyń eńbek sińirgen jattyqtyrýshysy eken.

Sportshy azamattyń erligine tánti bolǵan Mádenıet jáne sport mınıstri Aqtoty Raıymqulova oǵan qońyraý shalyp, qaısarlyǵy men batyrlyǵy úshin alǵys bildirse, búgin Mádenıet jáne sport vıse-mınıstri Sáken Musaıbekov Almaty qalasyna batyrdy ádeıi quttyqtaı baryp, onyń ákesine mınıstrdiń alǵys hatyn tapsyrdy.

01

"Ulyńyz Dáýrenniń órtten birneshe adamdy qutqaryp qalǵanyn estip, jeke ózińizge alǵysymdy bildirip otyrmyn. Aýyr atletıkadan Qazaqstan chempıony, halyqaralyq týrnırlerdiń birneshe dúrkin jeńimpazy Dáýren batyldyqtyń shynaıy úlgisin kórsetti. Ol esh oılanbastan, óz ómirin qaterge tigip, basqalardyń ómirine arasha tústi. Keshe ǵana Sport kúni merekesin atap ótip, dál osy jańalyqty baspasóz betterinen kórgende qazaqtyń jigitteri úshin kókiregime maqtanysh sezimi uıalady. Qaısarlyq minez tanytyp, sportshynyń rýhyn barshaǵa tanytqan Dáýrenniń áreketi óskeleń urpaqqa úlgi bolatynyna senimdimin. Siz osyndaı batyr ulyńyzben maqtana alasyz" delingen eken alǵys hatta.

 

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar