Shilde aıynyń sońynda Aqparat jáne qoǵamdyq damý mınıstri Aıda Balaeva "Egemen Qazaqstan" gazetiniń dırektorlar keńesine jáne "Qazmedıa ortalyǵy" baqylaýshylar keńesiniń quramyna engen bolatyn. Mınıstr "Balaevaǵa 3 suraq" baǵdarlamasynda mundaı sheshimniń ne sebepti qabyldanǵany jaıynda sóz etti.
"Mindetti túrde ár qosymsha júktemeniń óziniń jaýapkershiligi bar. Aqparat mınıstrligin basqaryp otyrǵannan keıin elimizdegi eń bedeldi medıa qurylymdardyń ishindegi prosesterdi qadaǵalap otyrý kerek. "Egemen Qazaqstan" 100 jyldyq tarıhy bar basylym, búgingi tańda 185 myń oqyrmandy qamtyp otyr. Elde bolyp jatqan tynys-tirshiliktiń barlyǵyn osy "Egemen Qazaqstan" gazetinen jáne "Kazpravda" basylymy arqyly bilýge bolady. "Qazmedıa ortalyǵy" 10-nan astam iri BAQ redaksııalary shoǵyrlanǵan úlken ortalyq. Osy eki uıymnyń ishindegi ishki prosesterdiń barlyǵyn der kezinde kórip otyrý, sheshim qabyldaý, ishindegi kókeıkesti máseleler bolsa, ony birge sheship otyrý úshin osyndaı sheshim qabyldandy. Meniń oıymsha, bul dástúrli dúnıe", - dedi Aıda Balaeva.
