Polıseıler bul erejelerdi mal urlyǵyna jol bermeýdiń profılaktıkasynda mańyzdy qadam dep otyr. Erejelerde tuńǵysh ret zańdy túrde «qańǵyǵan mal» túsinigi engizildi. Endi qańǵyrtyp jibergen maly úshin ıeleri ákimshilik jaýapkershilikke tartylady. Budan bylaı maldy tek uıymdastyrylǵan túrde ǵana baǵý qajet. Eger ıeleri maldaryn baqtashy jaldap baqqyzsa, onda jergilikti basqarý organyny, mal ıesi jáne baqtashy úsh jaqty shart jasasýǵa mindetti. Bul baqtashynyń mal ıesi aldyndaǵy mindettemesine kepil de bola alady.
Jańa prınsıpterdi engizýde Mamlıýt aýdany polısııa bóliminiń qyzmetkerleri belsendi jumystar atqaryp keledi. Munda jergilikti atqarýshy organdardyń qarajatyna kásipkerlerdiń qoldaýymen 11 arnaıy oryn jasaldy, bul jerlerge qańǵyryp, ıesiz júrgen maldar qamalady. Basqasha aıtqanda bul maldyń «aıyp turaǵy» ispettes.
Jýyrda polıseıler Meńkeser kóli mańynda jaıylyp, baqtashysyz, ıesiz, bos júrgen 12 bas jylqyny kórip, qýyp ákelip osyndaı oryndardyń birine qamady. О́ıtkeni, ıesiz mal sýyq qoldy adamdardyń qoldy qylýyna jol berip, qylmys jasalýy múmkin edi.
Mamlıýt aýdany PB bastyǵy, polısııa podpolkovnıgi Serik Áljanovtyń aıtýyna qaraǵanda bul maldardyń en tańbasy da bolmaǵan. Munyń ózi olardyń ıelerin izdestirýde qıyndyq týǵyzady. «Janýarlar urlanǵan ne joǵalǵan jaǵdaıda ıelik quqyǵyn dáleldeý qıynǵa soǵýshy edi»,- deıdi ol.
Aýyldastardan habar alǵan janýarlardyń ıeleri keshke jaqyn kelip, Ákimshilik quqyq buzýshylyq týraly kodekstiń 408-baby boıynsha aıyppul tólegen soń, jylqylaryn alyp ketken. Olardyń bári Meńkeser aýylynyń turǵyndary eken.
«Baqtashysyz erkin jaıylǵan mal urylardyń oljasy bolady, sonymen birge janýarlar avtomobıl joldaryna shyǵyp ketip, apatty jaǵdaı týdyryp jatady. Sóıtip, polısııa bólinisteriniń kúshterin barynsha jumyldyrýǵa, basqa qylmystardy tergep-tekserýine kedergi keltiredi. Sondyqtan mundaı qubylystardy toqtatqan jón», - deıdi SQO PD bastyǵynyń orynbasary, polısııa polkovnıgi Rýslan Nazarov.
Qazir baqtashylar jáne jergilikti ákimdiktermen úsh jaqty shart jasasqan sharýashylyqtardyń basym bóliginde mal urlyǵy kúrt azaıǵan. Sonymen birge jańa ereje boıynsha maldardy mindetti túrde tańbalaý men bırkalaý kerek. Buryn mundaı talap tek usynymdyq sıpatta bolatyn. Keıbir shekteýler de engizilgen, máselen, aýrý maldy jaıylymǵa jiberýge tyıym salynady. Sondaı-aq, mal aıdaý, maldy sýarý sııaqty mal jaıýdyń basqa da sharttary rettelgen. Qazir oblysta qańǵyrǵan maldardy ýaqytsha qamaıtyn, jergilikti atqarýshy organ esebinen ustalatyn, 54 oryn ázirlengen. Olarǵa osy ýaqytqa deıin 88 tuıaq mal qamalǵan.
