Konstıtýsııa osydan 25 jyl buryn álemniń ozyq elderiniń konstıtýsııasyndaǵy qajetti talaptar men normalardy úlgi retinde alyp, elimizdiń ózindik erekshelikteri eskerile otyryp qabyldanǵan bolatyn.
Odan keıin Konstıtýsııaǵa zaman talabyna saı birneshe ózgerister engizildi. Ol ózgeristerdiń barlyǵy elimizde, jalpy álemde bolyp jatqan geosaıası, áleýmettik, ekonomıkalyq ózgeristerge jaýap retinde engizilgen. Atalǵan ózgeristerdiń negizgi maqsattarynyń barlyǵy – elimizdiń, halqymyzdyń, azamattarymyzdyń áleýetin kóterý, eldiń ekonomıkasyn nyǵaıtý.
Kez kelgen zaıyrly, demokratııalyq memleket óziniń Ata Zańyna súıenip, halyqqa qatysty sheshimder qabyldaıdy. Sheshimderdiń iske asýy úshin olardy zańdyq turǵyda qamtamasyz etý mańyzdy. Onsyz kózdegen maqsatqa jetý múmkin emes.
Sondyqtan Elbasynyń jáne Prezıdenttiń bastamasymen mańyzdy máseleler kóterilip, olardyń barlyǵy Parlament qabyrǵasynda qaralyp, áleýetti zań normalaryna aınalyp otyrady. Sol sebepti qoldanystaǵy zańnamaǵa ýaqyt jáne qoǵam talabyna saı ózgerister engizip otyrý qalypty qubylys.
Mine, Ata zańymyz búginde osyndaı mańyzdy da mazmundy ózgeristermen bekemdelgen, shyńdalǵan negizgi quqyqtyq qujatymyz retinde qoǵam ómiriniń baǵyt-baǵdaryna aınalyp otyr.
