"Memleket basshysy Qasym-Jomart Toqaev mınıstrlikke "Pedagog mártebesi týraly" zań normalaryn iske asyrý boıynsha atqarylyp jatqan jumystardy jalǵastyrýdy tapsyrdy. Atalǵan qujattyń mańyzdy erejeleriniń biri – pedagogti mindetine jatpaıtyn fýnksııalarǵa tartýdan qorǵaý, orynsyz eseptilikten bosatý. Bul normalar jańa oqý jyly qarsańynda óte ózekti", dedi Bilim jáne ǵylym mınıstri.
Ashat Aımaǵambetovtyń aıtýynsha, mınıstrliktiń osyǵan qatysty qatań ustanymdaryna qaramastan, osy erejelerdi buzý faktileri áli de kezdesetinin atap ótti.
"Osydan birneshe apta buryn Lengir mektep-ınternatynda ákimshilik is qozǵaldy, onda pedagogterdi laýazymdyq mindetterine kirmeıtin jumystarǵa tartqan. Bilim salasynda sapany qamtamasyz etý departamenti oqıǵa ornyna baryp, qyzmettik tekserý júrgizdi. Faktiler rastaldy jáne mektep dırektorynyń mindetin atqarýshy ákimshilik jaýapqa tartyldy", deıdi A.Aımaǵambetov.
Aıta keteıik, Túrkistan oblysynyń Kentaý qalasyndaǵy Molda Musa atyndaǵy mektepte de qyzmettik tekserý júrgizilgen. Onda muǵalimdi mektepti jóndeý jumystaryna tartqan. Atalǵan faktini tekserý barysynda rastalǵan. Mektep dırektorynyń mindetin atqarýshy da, Kentaý qalalyq bilim bóliminiń qyzmetkeri de ákimshilik jaýapqa tartylǵan eken.
Sondaı-aq Bilim mınıstriniń aqparaty boıynsha, jalpy osy qysqa ýaqyttyń ózinde Bilim salasynda sapany qamtamasyz etý jónindegi aýmaqtyq departamentterge júzden astam ótinish kelip tústi. Nátıjesinde, laýazymdy tulǵalarǵa da, oqýshylardyń ata-analaryna da qatysty 30-dan astam ákimshilik jaza qoldanyldy. Bul jumys turaqty túrde júrgiziledi. Zańsyzdyqqa jol bergen jaýapty tulǵalarǵa qatysty sharalar munymen shektelmeıdi. Ákimshilik jazalardan bólek, jumystan bosatý týraly sheshimder de qabyldanǵanyn qosa ketti.
"Muǵalimderdiń quqyǵyn qorǵaý – jergilikti aýmaqtyq organ basshylarynyń da, mektep dırektorlarynyń da tikeleı mindeti. Pedagogterdiń quqyqtaryn qorǵaý týraly aıtqanda, muǵalimder óz mindetterin adal oryndaý máselesin de este saqtaýy qajet. О́ıtkeni jańa Zańnyń talaptary da jańa. Pedagogıkalyq qyzmetpen aınalysatyn árbir jan jas urpaqqa úlgi bolyp, óz jumysynda adamgershilik qaǵıdalary men moraldyq qundylyqtardy basshylyqqa alýy tıis. Minez-qulyq mádenıeti, ádeptilik, adaldyq, adamnyń ar-namysy men qadir-qasıetin qurmetteý – pedagogıkalyq etıkanyń negizi. Osy qaǵıdalardyń saqtalýyn baqylaý úshin biz muǵalimderge qatysty quqyqbuzýshylyqtar men pedagogıkalyq etıkany óreskel buzý týraly daýly máselelerdi qarastyratyn arnaıy alqaly organ qurýdy qarastyrýdamyz. Bul – pedagogıkalyq etıka jáne muǵalimderdiń quqyqtaryn qorǵaý jónindegi keńes. Mundaı ınstıtýt alǵash ret pılottyq rejimde osy jyldyń tamyz aıynan bastap, Nur-Sultan qalasynda jumys isteýdi bastady. "Bolashaqta etıka boıynsha Keńester elimizdiń barlyq aımaǵynda quryla alady. Olar bilim berý salasynda sapany qamtamasyz etý departamentteri janynda jumys isteıtin bolady. Barlyǵymyz memlekettik qyzmetkerlerdiń Ádep jónindegi keńesiniń tıimdi jumysynyń kýási boldyq. Bizdiń jańadan qurylǵan Keńesterimizdiń qyzmeti sonyń úlgisi boıynsha uıymdastyrylady. Munyń bári – úlken bastama: ár muǵalim óziniń mártebesin maqtan tutýy kerek. Yńǵaıly jaǵdaıda jumys istep, sapaly bilim berýi kerek. О́ıtkeni bizdiń balalarymyzdyń ál-aýqaty men bilimi ustazdardyń qolynda", deıdi Ashat Aımaǵambetov.
