"Memleket basshysy ekonomıka, áleýmettik, saıası salalarǵa qatysty aldaǵy basymdyqtardy aıqyndap berdi. Prezıdentimiz ekonomıkalyq ósimdi qalpyna keltirý, halyqtyń ál-aýqatyn arttyrý, quqyq qorǵaý júıesin ári qaraı jańǵyrtý, saıası reformalardy jalǵastyrý máselelerine toqtalyp, Parlament pen Úkimettiń aldyna naqty maqsattar qoıdy. Joldaýda aıtylǵan tapsyrmalardy zańnamalyq turǵydan ýaqtyly ári sapaly qamtamasyz etý – bizdiń negizgi mindetimiz", – dedi Senat Tóraǵasy.
Máýlen Áshimbaev senatorlar óńirlerdegi jaǵdaıǵa monıtorıng júrgizip, halyqty alańdatqan ózekti máselelerdi sheshýge atsalysqanyna nazar aýdardy.
Jaz boıy elimizdegi jáne álemdegi epıdemıologııalyq ahýal kúrdeli bolǵany belgili. Prezıdenttiń tapsyrmasy boıynsha qajetti qarajat bólinip, tıisti zańnamalyq aktiler qabyldandy.
"Qazir jaǵdaıdyń turaqtalyp kele jatqanyn kórip otyrmyz. Biraq Prezıdentimiz aıtyp ótkendeı, sanıtarlyq, epıdemıologııalyq rejımge, saqtyq sharalaryna basa mán berýimiz kerek. Osy jolda depýtattar Memleket basshysynyń tapsyrmalary aıasynda qajetti zańdar qabyldaý jumysyn jalǵastyratyn bolady", – dedi Máýlen Áshimbaev.
Senat aldaǵy ýaqytta jańa depýtattyq qurammen jumys isteıdi. Naqty aıtqanda, 2020 jyldyń 12 tamyzynda Senat depýtattarynyń saılaýy ótip, onyń qorytyndysy boıynsha Olga Perepechına, Álı Bektaev, Sergeı Ershov jáne Aıgúl Qapbarova jańa merzimge qaıta saılandy. Sondaı-aq, senatorlar qataryna jańadan 13 depýtat qosyldy. Palatanyń búgingi otyrysy kezinde olar ant qabyldady.
О́z kezegende Senat Tóraǵasy jańadan saılanǵan depýtattardyń qyzmetine tabys tilep, kásibı biliktilikteri men mol tájirıbelerin zań shyǵarý qyzmetinde keńinen paıdalanatynyna jáne Senat jumysyna tyń serpin beretinderine senim bildirdi.
Sonymen qatar otyrys barysynda Senat Tóraǵasynyń orynbasary bolyp Nurlan Ábdirov saılandy. Odan bólek, Joǵarǵy Palata komıtetteriniń quramy belgilenip, olardyń tóraǵalary saılandy. Atap aıtqanda, Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy bolyp Vladımır Volkov; Qarjy jáne bıýdjet komıtetiniń tóraǵasy bolyp Olga Perepechına; Halyqaralyq qatynastar, qorǵanys jáne qaýipsizdik komıtetiniń tóraǵasy bolyp Muhtar Qul-Muhammed; Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy bolyp Dáýren Ádilbekov; Áleýmettik-mádenı damý jáne ǵylym komıtetiniń tóraǵasy bolyp Murat Baqtııaruly; Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy bolyp Álı Bektaev saılandy.
