"Dostar, ózderińizge belgili, sybaılas jemqorlyqqa qarsy kúresti kúsheıtý – Memleket basshysy saıasatynyń basty baǵyttarynyń biri. Qazirgi tańda Úkimetpen birlesip, EYDU, GREKO, BUU usynymdarynan týyndaıtyn sybaılas jemqorlyqqa qarsy bastamalar pysyqtaldy. Olardyń negizgisi – sheneýnikterdiń zańsyz baıyǵany úshin azamattyq-quqyqtyq jaýapkershilikti engizý", deıdi Alık Shpekbaev.
Alık Shpekbaevtyń aıtýynsha, 2021 jyldan bastap jalpyǵa birdeı deklarasııalaýdyń birinshi kezeńin iske qosyp, kelesi tetikti usynylady. Bastapqy kiris deklarasııasynda memlekettik qyzmetshi óziniń barlyq aktıvterin tirkeıdi. Eger kezekti deklarasııany tapsyrý kezinde onyń negizdeı almaıtyn tabysynyń edáýir ósýi anyqtalsa, oǵan memlekettik qyzmetten bosatý jáne negizsiz asyp ketken somany tárkileý sharasy qoldanylatynyn atap ótti.
– Damyǵan elderde qoldanylatyn kásibı satylmaýshylyqqa tekserý ınstıtýtyn engizý birshama aldyn alý áserin beretin bolady. Sondaı-aq, kún tártibinde memlekettik qyzmetshi emes, biraq jarııalyq mindetterdi oryndaıtyn tulǵalarǵa sybaılas jemqorlyqqa qarsy zańnamany qoldaný máselesi de bar. Iаǵnı, biz para alǵany úshin kommersııalyq bankterdiń top-menedjerlerin, tabıǵı monopolııalar sýbektileriniń basshylaryn, jeke sot oryndaýshylaryn jáne jarııa qyzmetshilerdiń basqa sanattaryn memlekettik qyzmetshiler syndy qylmystyq jaýapkershilikke tartýdy usynamyz. Bul tájirıbe búkil álemde keń taralǵan, – deıdi Sybaılas jemqorlyqqa qarsy is-qımyl agenttiginiń tóraǵasy.
Sondaı-aq ol qoǵamnyń sybaılas jemqorlyqty barynsha azaıtýǵa degen talpynysy burynǵydan da zor. Sondyqtan jemqorlyqqa qarsy keshendi reformalardyń ózektiligin asyra baǵalaý múmkin emestigin tilge tıek etti.
"Elbasy men Memleket basshysynyń tolyq qoldaýyna ıe bola otyryp, biz aldymyzǵa Qazaqstanda sybaılas jemqorlyqqa qarsy eń pármendi quraldardy engizý maqsatyn qoıamyz. Bul – ekonomıkalyq ósý men azamattardyń ál-aýqatyn arttyrýdyń negizgi sharty", deıdi Alık Shpekbaev.
