Bul jóninde Batys Qazaqstan oblysynyń ekonımıka jáne bıýdjettik josparlaý basqarmasynyń basshysy Tilepbergen Kaıýpov baıandama jasady. Qosymsha baıandamany Batys Qazaqstan oblystyq máslıhattyń qarjy jáne bıýdjet máseleleri boıynsha turaqty komıssııasynyń múshesi Farıd Bahtıozın jasady.
"2020 jylǵa arnalǵan oblystyq bıýdjettiń naqtylanýynyń jalpy somasy shamamamen 3 mlrd teńgeni qurady. Sonyń ishinde salyqtyq túsimderdi ulǵaıtý 2,2 mlrd teńge, bıýdjettik baǵdarlamalar ákimshileriniń shyǵyndaryn ońtaılandyrý arqyly qarjy bosatý 868 mln teńge. Kórsetilgen ózgerister esebimen oblystyq bıýdjet 250 mlrd teńgeni quraıdy. Birinshi kezekte shyǵyndar koronavırýsqa qarsy kúres sharalaryn qarjylandyrýǵa joldandy.
Atap aıtqanda, koronavırýsqa qarsy kúres aıasynda oblystaǵy ınfeksııalyq jáne provızorlyq stasıonarlarǵa medısınalyq jabdyqtardy satyp alýǵa 603 mln teńge, medısınalyq tehnologııalyq jabdyqtar kesheni bar ınfeksııalyq aýrýhanany ornalastyrý úshin daıyn modýldik qurylǵyny satyp alý jáne budan ári qurylys-montajdaý jumystarymen 2 mlrd teńge", - dedi oblystyq ekonomıka jáne josparlaý basqarmasynyń basshysy óz sózinde.
Kezekten tys sessııanyń kún tártibinde oblystyq aýmaqtyq saılaý komıssııasynyń tóraǵasy Ǵaısa Qapaqovtyń habarlamasy jáne «Batys Qazaqstan oblysynyń jasyl ekpelerdi kútip ustaý jáne qorǵaý qaǵıdalaryn bekitý týraly» oblystyq energetıka jáne turǵyn úı-kommýnaldyq sharýashylyq basqarma basshysynyń mindetin atqarýshy Beıimbet Mýsınniń, «Batys Qazaqstan oblysynyń aýmaǵynda aýyl sharýashylyǵy janýarlaryn jaıýdyń qaǵıdasyn bekitý týraly» oblystyq aýyl sharýashylyǵy basqarmasy basshysynyń mindetin atqarýshy Jasulan Halıýllınniń, Batys Qazaqstan oblysy Oral qalasynyń Eýrazııa dańǵylyn qaıta ataý týraly oblystyq tilderdi damytý basqarmasy basshysynyń mindetin atqarýshy Sveta Ǵanıevanyń, 2020 jyly koronavırýs indetimen kúrestiń jaı-japsary týraly oblystyq densaýlyq saqtaý basqarmasynyń basshysy Bolatbek Haıýpovtyń esebi tyńdalyp talqylandy.
Sessııaǵa oblys ákimi Ǵalı Esqalıev qatysyp, sóz sóıledi. Ol oblystyq bıýdjet, jasyl ekpelerdi kútip ustaý, oblys aýmaǵyndaǵy kıikterge rezervýar qurý jaıyn aıta kelip, koronavırýs indetiniń seıilmegendigin, aýrýdyń aldyn alý sharalary júrgizile beretindigin aıtty.
"Aramyzda áli de meıramhanada toı jasaýǵa ruqsat berińiz, kóp adam bolmaıdy. Bir bólmede tek 30, ekinshi bólmede taǵy sonshama adamdy jınap ótkizemiz, - deıtinder bar. Bul durys emes. Eger kúni keshegi jaǵdaı qaıtalansa, dárigerler taǵy jetispeıdi. Sondyqtan burynǵy daǵdydan arylyp, buǵan túsinistikpen qaraý kerek. Saqtanbasaq, indettiń órship ketýi múmkin. Indetke qarsy kúreste tek dárigerler ǵana emes, eldiń bári atsalysty. Telefonmen keńes berip otyrǵan jandar da boldy. Olardyń bárine de alǵysymdy bildiremin", - dedi ol.
Oblys basshysy sóziniń sońynda jınalǵan qaýymdy sessııa jumysy barysynda depýtattar sheshimimen qaladaǵy Eýrazııa dańǵylyna Uly Abaıdyń esimi berilýimen quttyqtady.
