Qaıratker esimi bilim oshaǵyna bıylǵy naýryz aıynda berilgen bolatyn. Osydan keıin oblystyq bıýdjetten qajyr-qaıratyn eldiń órkendeýine arnaǵan azamattyń músinin ázirleýge qarjy bólinip, ol Qazaqstan Respýblıkasy Mádenıet jáne sport mınıstrligi janyndaǵy memlekettik komıssııa kelisimin aldy.
Saltanatty sharada Qazaqstan Respýblıkasynyń Memlekettik hatshysy Qyrymbek Kósherbaevtyń quttyqtaý haty oqyldy. Oblys ákimi Gúlshara Ábdiqalyqova Araldan shyǵyp, Alashqa tanylǵan eldiń ulynyń rýhyn ulyqtaý keıingilerge paryz ekenin atap ótti.
– Uly adamdardyń ómir joly urpaq úshin árqashan ónege. Táýelsiz Qazaqstan Respýblıkasynyń tuńǵysh Premer-Mınıstri qyzmetin atqarǵan Uzaqbaı Qaramanov aǵamyzdyń eldik múddeni joǵary qoıǵan qaıratker bolǵany qaı býyn úshin de úlgi. Jurtyna adal qyzmet etip, II dárejeli «Barys», «Eńbek Qyzyl Tý» ordenderimen, Qazaq KSR Joǵarǵy Keńesiniń Qurmet gramotalarymen jáne túrli joǵary dárejedegi medaldarmen marapattalǵan Uzaqbaı Qaramanuly jurt jadynan óshpeıtin tulǵa, – dedi oblys ákimi.
Aýdan turǵyndary men qaıratkermen úzeńgiles azamattar, izbasar inileri jıylǵan sharada Mádenıet jáne sport mınıstri Aqtoty Raıymqulova, Qazaqstan Respýblıkasyna eńbegi sińgen mádenıet qaıratkeri, ardager-jýrnalıst Shákirat Dármaǵambetov lebiz bildirdi.
Osydan keıin qonaqtar Uzaqbaı Qaramanovtyń jeke zattary men ol týraly jazylǵan eńbekterden jasaqtalǵan qoǵamdyq mýzeı jumysymen tanysyp, «Bastaý» kásibı qoǵamdastyq kabınetinde úzdik oqýshylarymen kezdesti.
Aýdandyq bilim bóliminiń basshysy Sanıra Jannazarovanyń aıtýynsha, qaıratker esimin ıelengen, 1200 oryndyq №262 mektep-gımnazııasy 2009 jyly paıdalanýǵa berilgen. Ujymda 106 pedagog bar. О́tken oqý jylynyń ózinde 8 muǵalim respýblıkalyq ıdeıalar festıvali men forýmdarda, 21 muǵalim oblystyq deńgeıdegi semınarlar men konferensııalarda is-tájirıbesin taratypty. Bıyl bilim oshaǵynan UBT-ǵa qatysqan 24 túlektiń 22-i memlekettik bilim grantyn ıelengen.
QYZYLORDA
