Aıta keteıik, atalǵan bazalyq stansa tek osy eldi mekendi ǵana emes, sonymen birge jaqyn mańda ornalasqan Sentralnoe aýylyn da joǵary jyldamdyqtaǵy ınternet baılanysymen qamtýǵa múmkindik beredi. Memleket-jekemenshik áriptestigi negizinde elimizdiń iri baılanys operatorlary iske asyryp jatqan «optotalshyq» qurylysynyń nátıjesinde óńirge 876 shaqyrymdyq talshyqty-optıkalyq baılanys jelileri (TOBJ) tóselip, 36 aýyl keńjolaqty ınternetpen qamtyldy.
Negizinde, aýyldyq jerlerdi TOBJ tehnologııasy boıynsha jyldamdyǵy joǵary ınternetpen qamtamasyz etý jobasy osydan eki jyl buryn bastalyp, bul jumystar elimizdiń Batys Qazaqstan, Atyraý jáne Pavlodar oblystarynda tolyǵymen aıaqtalǵan bolatyn. Endi bul óńirlerdiń qataryna Qaraǵandy oblysy da qosyldy.
Vedomstvo basshysy elimizdegi iri ónerkásip oshaqtary kóp shoǵyrlanǵan oblysta «optotalshyq» tóseý jumystaryn aıaqtaýdyń óńirler arasyndaǵy sıfrlyq teńsizdikti joıýǵa yqpal etetinin atap ótti.
– Halyqtyń ómir súrý sapasyn jaqsartýdaǵy mindetti sharttardyń biri – joǵary jyldamdyqty ınternetpen qamtý. Aýyl jastarynyń eńbek naryǵynda básekege qabiletti bolýy úshin ınternetsiz sapaly bilim alý múmkin emes. «Optotalshyqty» baılanys jelisin salý jobasy elimizge adamı kapıtal áleýetin arttyrýǵa múmkindik beredi. Sondaı-aq aýyl turǵyndary memlekettik qyzmetterdi elektrondy formatta alatyn bolsa, aýyldyq aýrýhanalar telemedısına elementterin paıdalana alady. Al TOBJ-ǵa qosý arqyly uıaly baılanys operatorlary óz jelilerin keńeıtip, el halqynyń 99%-dan astamyn keńjolaqty ınternetpen qamtý múmkindigine ıe bolmaq. Muny eldegi sıfrlyq teńsizdikti joıýdaǵy serpilis dep ataı alamyz, – dedi Baǵdat Mýsın.
Sapar barysynda «Qazaqtelekom» AQ basqarma tóraǵasy Qýanyshbek Esekeev TOBJ jobasyn odan ári iske asyrý nátıjelerimen jáne aldaǵy josparlarymen bólisti.
– Joba 2,5 myńǵa jýyq memlekettik mekeme jumys istep jatqan 828 aýylǵa derekterdi berýdiń barlyq tehnologııalarynyń arasynda sapasy eń joǵary jáne úzdiksiz baılanysty qamtamasyz etetin «optotalshyqty» jetkizýdi kózdeıdi. Bul úshin biz elimiz boıynsha 14,5 myń shaqyrym baılanys jelisin tóseýdi josparlap otyrmyz. Búginde 12 myń shaqyrymnan astam jeli tóselip, 632 aýyldyq eldi mekende TOBJ-ǵa 1900-den astam mektep, aýrýhana, ákimdik, polısııa bólimsheleri jáne basqa da memlekettik mekemeler qosyldy, – dedi ol.
Bul joba qazaqstandyq aýyldardy uıaly baılanyspen jáne mobıldi ınternetpen qamtamasyz etýge baǵyttalǵan taǵy bir aýqymdy «250+» jobasyn iske asyrýǵa yqpalyn tıgizedi.
Al «Ksell» AQ bas tehnıkalyq dırektory Asqar Eserkegenov optıkanyń óńirlerge jetkizilýi uıaly baılanys operatorlaryna birqatar múmkindik beretinin aıtty.
– Endi olar ózderiniń bazalyq stansalaryn daıyn ınfraqurylymǵa ornata alady. Halqynyń sany 250 adamnan asatyn aýyldyq eldi mekenderdi keńjolaqty mobıldi ınternetpen qamtamasyz etý jobasy aıasynda «Ksell» aksıonerlik qoǵamy 307 aýyldy ınternetke qosady. 800 MGs dıapazony 4-5 shaqyrym radıýstaǵy aýmaqty ınternet baılanysymen qamtýǵa múmkindik beredi, – dep atap ótti ol.
Jumys sapary aıasynda Pıonerskoe aýylyndaǵy balalar úıindegi kompıýterlik synyppen, Osakarov aýdanynyń qoǵamdyq qabyldaý bólmesiniń qyzmetimen tanysqan Baǵdat Mýsın elimizdegi úzdik ázirleýshiler men IT-salasynyń mamandaryn biriktirgen biregeı joba – «Terrıkon alqaby» IT-hub jobasyn ázirleýshilermen de kezdesti. Mınıstrdiń mindetin atqarýshy osy joba aıasynda aınalysyp jatqan jumystardyń barlyǵynyń qazirgi ýaqytta óte ózekti ekenin eske saldy.
– Men óz áriptesterimdi, sıfrlandyrýshylar men jańashyldardy kórip turmyn. Bizdiń jastar óte kreatıvti jáne olardyń kelesheginen zor úmit kútemiz. Degenmen olardyń jobalaryn júzege asyrýyna, ózin-ózi damytýyna jaǵdaı jasaý kerek. Mine, osyndaı jobalar olarǵa kómektesedi. Búginde elimizde Astana hub IT-startaptarynyń iri tehnoparki jumys isteıdi. Qazir ol 100%-ǵa tolyq. Olardyń startap bastamalaryn halyqaralyq sarapshylar da baǵalap úlgerdi. Qazir biz osyndaı durys baǵyttaǵy bastamalardyń qajettiligin kórip otyrmyz, – dep atap ótti ol.
Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın atalǵan joba jumysyna joǵary baǵa berip, bul bastamalardyń «sıfrlyq» ıdeıalardy damytýǵa sony serpin beretinine senim bildirdi.
Qaraǵandy oblysy
