Sharany Mádenıet jáne sport mınıstrligi Til saıasaty komıteti tóraǵasynyń orynbasary Ádilbek Qaba quttyqtaý sózimen ashty. Ol Qazaqstan Respýblıkasynyń Prezıdenti Qasym-Jomart Toqaevtyń "Qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keledi dep esepteımin" degen sózin eske sala kelip, Qazaqstan halqy tilderi kúni merekesine oraı kórsetiletin jobanyń elimizdiń mádenı ómirinde eleýli oqıǵa bolatynyna toqtalyp: "Halqymyzdyń boıyndaǵy asyl qasıetterdiń altyn uıasy – ana tilimiz. Búgingi shara – qazaq tiline degen qamqorlyqtyń belgisi. "Jalǵyzdyń úni, jaıaýdyń shańy shyqpaıdy" dep jatamyz, kerisinshe, til maıdanynda aımaqtardaǵy Til basqarmalary, til patrıottary, tili úshin shyryldap júrgen jeke tulǵalar úlken ról atqarady. Kórermenge jol tartyp bara jatqan bul jobanyń basy-qasynda bolǵan barsha áriptesterime alǵys aıtamyn", dedi.
Astana telearnasynan kórsetiletin "1 mınýt" jobasynyń maqsaty – keıbir sózderdiń durys aıtylyp, durys jazylýyna kóńil aýdartý, jalpy qazaq tilinde saýatty jazýǵa, sóıleýge mashyqtandyrý, til mártebesin kóterý eken.
Joba jetekshisi belgili jýrnalıst Nartaı Aralbaıulynyń aıtýyna qaraǵanda jumys toby, dúnıe júzindegi osy mazmundas baǵdarlamalardyń birazyn sholyp shyǵyp, aqyry breın-rıng oıyny tásilin tańdapty. Ataý qoıar kezde poetıkalyq ataýlardan sanaly túrde bas tartyp, el ishinde "1 mınýttan keıin kelemin" degen sekildi jıi qaıtalanyp aıtylyp júrgen sózge toqtam jasaǵan.
