Bul maqsatta kompanııa demeýshilik kómek retinde 1 mlrd teńge qarajat bóldi. Bul qarajatqa koronavırýstyq pnevmonııamen jáne basqa da tynys alý júıesi aýrýlaryn emdeıtin, Eýropada shyǵarylǵan О́JJ apparaty satyp alyndy. Jabdyq О́JJ apparattary jetpeı turǵan 14 oblystyq jáne 3 respýblıkalyq mańyzy bar qalanyń emhanalaryna túsedi. Medısınalyq mekemelerdiń tizimi Densaýlyq mınıstrligi jáne jergilikti atqarýshy organdar usynǵan derekterdiń negizinde jasaldy jáne qazirgi tańda 42 О́JJ apparatyn alýshylar aıqyndaldy.
Kompanııa qyzmetkerleriniń apparatty tapsyrý sharasy Jańaózen kópbeıindi qalalyq aýrýhanasynda ótti.
"Búgin biz "QazTransOıl" kompanııasy atynan demeýshilik kómek retinde 2 apparatty Jańaózen qalasyndaǵy aýrýhanaǵa tapsyrdyq. Apparattar naýqastardyń tez emdelip shyǵýyna kómektesedi dep senemiz", - dedi tapsyrý rásiminde "QazTransOıl" AQ Mańǵystaý munaı qubyry basqarmasy bastyǵynyń orynbasary Salamat Ismýrzın.
Jańaózen qalalyq kópbeıindi aýrýhanasynyń dırektory mindetin atqarýshy Jańabaı Ońaıbaev búginde 360 orynǵa eseptelgen aýrýhanaǵa mundaı jabdyqtardyń asa qajettiligin atady.
"Keshegideı indet órshigen ýaqytta birinshi kezekte ókpeni jasandy jeldetý apparattarynyń asa kerek bolǵanyn kórdik. Shúkir, kóptegen kompanııalar demeýshilik kórsetýde, solardyń biri retinde "QazTransOıl" kompanııasyna rahmet aıtamyz. Árıne qazir túrli boljamdar aıtylýda, degenmen indettiń ekinshi tolqyny qaıtalanbasyn dep tileımiz. Qalaı bolǵanda da naýqastardy emdeýde osy apparattardyń kómegi zor", - dedi ol.
"QazTransOıl" AQ qyzmetkerleriniń aıtýynsha, Almaty qalasynyń Ortalyq qalalyq klınıkalyq aýrýhanasy, qalalyq jedel shuǵyl kómek kórsetý aýrýhanasy jáne №4 qalalyq klınıkalyq aýrýhana bir О́JJ apparatynan aldy. Sondaı-aq qajet jabdyqtar Nur-Sultan, Aqtóbe, Qaraǵandy, Temirtaý, Qostanaı, Jetiqara, Rýdnyı jáne Lısakovsk medısınalyq mekemelerine jiberildi jáne О́JJ apparattarymen Batys Qazaqstan, Soltústik Qazaqstan, Túrkistan jáne Jambyl oblystarynyń aýrýhanalary jaraqtandyrylatyn bolady. Al qyrkúıekte Pavlodar jáne Ekibastuz medısınalyq mekemelerine jetkizý josparlanyp otyr. Qalǵan 24 О́JJ apparaty Atyraý, Shyǵys Qazaqstan, Almaty, Aqmola jáne Qyzylorda oblystaryna bólinedi.
