Qazaqstan Respýblıkasynyń Tuńǵysh Prezıdenti – Elbasy N.N. Nazarbaevtyń birinshi rezıdensııasy ǵımaratynda ornalasqan Elbasy kitaphanasy osy jyldyń 3 qyrkúıeginen bastap kelýshilerge esigin qaıta ashty. Tegin ekskýrsııalyq jáne taqyryptyq ekskýrsııalar on adamnan aspaıtyn toptarǵa aldyn ala jazylý arqyly qol jetimdi.
Elbasy kitaphanasynyń dırektory, saıası ǵylymdarynyń doktory, professor Ámirhan Rahymjanov atap ótkendeı, karantın kezinde kitaphana qalyptasqan jaǵdaıdyń talaptaryn qanaǵattandyra otyryp, jumystyń jáne kópshilikpen baılanystyń jańa formatyna kóshti. Pandemııa bastalmas buryn josparlanǵan kóptegen is-sharalar vırtýaldy kórmeler men ekskýrsııalarǵa aınaldy.
"Elbasy kitaphanasynyń ǵımaraty jabyq bolǵanymen, ol óz jumysyn toqtatqan joq. Barlyq is-sharalar vırtýaldy keńistikke kóshti. Bizdiń arnaıy jobamyz – Nazarbaev ortalyǵy men Elbasy kitaphanasy murajaıynyń kórme zaldaryna beınetýrlar. Biz merekeler men este qalarlyq datalarǵa arnalǵan beınetýrlar, sonymen qatar saýalnamalyq jáne taqyryptyq ekskýrsııalar daıyndadyq: Qazaqstan Respýblıkasynyń Memlekettik rámizderi kúnine, Halyqaralyq murajaılar kúnine, Halyqaralyq ıadrolyq synaqtarǵa qarsy kúnine, Qazaqstandaǵy Prezıdenttik ınstıtýttyń 30 jyldyǵyna jáne basqalarǵa arnalǵan. Olardyń barlyǵy qazaq, orys jáne aǵylshyn tilderinde ótedi", - dep Á. Rahymjanov barlyq beınetýrlardyń Elbasy kitaphanasy resmı saıtynyń "Beıne galereıasynda" ornalastyrylǵanyn atap ótti.
Beınekórmeler - karantın kezeńinde belsendi damyǵan Elbasy kitaphanasynyń keń qoryn tanytýdyń taǵy bir túri bolyp tabylady. Kórmeler ártúrli formatta ótkiziledi: taqyryptyq ekspozısııalardyń beınetýrlary; beınerolıkter; kórmeniń ár fragmentin egjeı-tegjeıli zertteýge bolatyn prezentasııa túrindegi dástúrli elektrondy format; alǵash ret "bir jádiger" kórmesi usynyldy.
