QR Qarjy mınıstrligi Memlekettik kirister komıtetiniń baspasóz qyzmetinen málim etkendeı, qoldanystaǵy salyq zańnamasyna sáıkes, biryńǵaı jınaqtaýshy zeınetaqy qory zeınetaqy jınaǵynan beretin tólemderge jeke tabys salyǵy salynady (Salyq kodeksiniń 326-baby).
"Bul rette, jeke tulǵalar eń tómengi 1 jalaqy mólsherindegi (42 500 teńge) salyqtyq shegerimdi qoldaný arqyly salyq salynatyn somany azaıtýǵa quqyly. Sonymen qatar, halyqtyń áleýmettik osal toptary (UOS-na qatysýshylarǵa teńestirilgender, barlyq toptaǵy múgedekter, múgedekterdiń ata-analary men qamqorshylary, jetim balalardy asyraýyna alǵan ata-analar) taǵy qosymsha 882 aılyq eseptik kórsetkish (1 AEK - 2778 teńge) mólsherinde shegerim qoldanýǵa quqyly. Bul - 2,3 mln teńgeni quraıdy (Salyq kodeksiniń 345, 346, 353-baptary). Tıisinshe, kórsetilgen shegerimderdi eskere otyryp, turǵyn úı satyp alýǵa, emdelýge jáne basqa da ruqsat etilgen maqsattarǵa zeınetaqy aqshasynan ishinara alynatyn somalarǵa 10% mólsherinde jeke tabys salyǵy salynady", dedi komıtet qyzmetkerleri.
Eske salaıyq, Qazaqstan halqyna Joldaýyn jarııa etken QR Prezıdenti Qasym-Jomart Toqaev 2021 jyldan bastap zeınetaqy jınaǵyn ishinara sheship alýǵa bolatynyn aıtqan edi. Osy rette, Eńbek jáne halyqty áleýmettik qorǵaý mınıstrligi zeınetaqy jınaqtaryn paıdalanýdyń "jetkiliktilik shegin" jarııalady.
Iаǵnı 20-59 (jáne odan joǵary) jastaǵy azamattar «jetkiliktilik sheginen» asyra jınaǵan zeınetaqy somasyn sheship ala alady. Ol aqshany turǵyn úı jaǵdaıyn jaqsartýǵa , emdelýge nemese qarjy kompanııalaryna basqarýǵa berýge jumsaýǵa bolady. Eger maqsatty paıdalanýǵa qajet bolsa, otbasy músheleriniń qarajatyn biriktirýge bolady.
