«Tótenshe jaǵdaı kezinde de Elbasy kitaphanasy óz jumysyn toqtatqan joq. Barlyq is-sharalar vırtýaldy túrde atqaryldy. Atap aıtqanda, Qazaqstan Respýblıkasynyń Memlekettik rámizder jáne Halyqaralyq murajaılar kúnin, sondaı-aq Halyqaralyq ıadrolyq synaqtarǵa qarsylyq sharasy, Qazaqstandaǵy Prezıdenttik ınstıtýttyń 30 jyldyǵy, t.b. qatarly aıtýly oqıǵalardy atap óttik. Bunyń barlyǵy kitaphananyń resmı saıtyndaǵy «Beıne galereıa» arqyly kópshilikke tanystyryldy. Beınekórmeler ártúrli formatta ótkiziledi: taqyryptyq ekspozısııalardyń beınetýrlar; beınerolıkter; prezentasııa túrinde dástúrli elektrondy format jáne alǵash ret «bir jádiger» ıdeıasy iske asty», deıdi Elbasy kitaphanasynyń dırektory, saıası ǵylymdarynyń doktory, professor Ámirhan Rahymjanov myrza.
Sonymen qatar Qazaqstan halqy Assambleıasynyń 25 jyldyǵyna arnalǵan «Ulttar mádenıetin ulyqtaǵan meken», Uly Jeńistiń 75 jyldyǵyna arnalǵan «Qazaqstan jaýyngerleri Stalıngrad túbindegi shaıqasta» atty kórmeler kópshilikke usynylyp, kúmis buıymdar toptastyrylǵan «Kúmistiń máńgilik sáýlesi» jáne «Pishin men sýrettiń úndestigi» atty tabaqtar toptamasynyń kórmesi de sátti kórsetilip, «Bolashaq sanasy», «Qazaqstandaǵy olımpıada qozǵalysy» t.b. beınekórmeler de kóptiń kóńilinen shyǵypty.
Bulardan basqa Elbasy N.Nazarbaevtyń ıdeıalary men bastamalaryna negizdelgen «N.Nazarbaev – Eýrazııalyq ıntegrasııanyń sáýletshici», «Elbasynyń asqaq armany», sondaı-aq Tuńǵysh Prezıdenttiń qoǵamdyq nagradalar jınaǵynyń kórmesi, kitaphanasynyń kóshpeli keshen kórme jobasynyń materıaldary boıynsha «N.Nazarbaev: dáýir, tulǵa, qoǵam» atty kórme uıymdastyrylypty.
Bıyl el kóleminde atap ótken Abaı Qunanbaıulynyń 175 jyldyǵyna oraı kitaphanada «Abaı murasy – tárbıeniń qaınar kózi» beınekórmesi daıyndalyp, Iаdrolyq synaqtarǵa qarsy kúrestiń halyqaralyq kúnine oraı «N.Nazarbaev – jahandyq antııadrolyq qozǵalystyń kóshbasshysy» ekspozısııasy atty beınetýr uıymdastyrylǵan eken.
Zaman talabyna saı Elbasy kitaphanasynyń ǵylymı jáne bilim berý qyzmeti de vırtýaldy keńistikke kóship, vebınarlar, marafon sabaqtary, beınedárister, dóńgelek ústelder, onlaın-konferensııalar ótkizýmen qatar, «Abaı oqýlary» estafetasy, «Elin súıgen Elbasy» murajaı sabaǵy, muǵalimderdiń respýblıkalyq shyǵarmashylyq baıqaýy, balabaqsha tárbıelenýshileri sýretteriniń «Atameken» onlaın baıqaýy, sonymen qatar ál-Farabıdiń 1150 jyldyǵyna arnalǵan elorda mektepteri arasynda «Uly dalanyń uly tulǵasy» onlaın baıqaýy joǵary deńgeıde atqarylǵan eken.
Sonymen birge Elbasy kitaphanasy óziniń saıty arqyly oqyrmandarǵa onlaın-kitaphana qyzmetin tegin paıdalanýǵa múmkindik berip otyrǵany qýantarlyq. Bundaǵy kitap qorynda elektrondy formatta úsh myńnan astam basylym bar eken. Bunyń syrtynda, kitaphana saıtynda qazaq halqynyń kórnekti tarıhı tulǵalaryna, sondaı-aq memlekettiń damýyna úles qosyp júrgen qaıratkerlerge arnalǵan «Máńgilik el alyptary», «Uly dala tarlandary», «Ulttyq kod» t.b. rýbrıkalar ashylypty. Jalpy alǵanda, Elbasy kitaphanasyna onlaın-qatynasýshylar sany 10 myńnyń ústine shyǵypty.
