"Birtýǵan qazaq-qyrǵyz oqyrmandarynan súıinshi suraıtyn jańalyǵymyz bar: arada alpys jyl salyp "Manas" dastany qazaqsha sóıledi.
Áıgili epos 1959-1962 jyldary akademık Muhtar Áýezovtiń jetekshiligimen aýdarylyp basylǵan bolatyn. Ol kezde jyrdy qazaqsha sóıletkender - dańǵaıyr jyrdy Q.Jumalıev, Ǵ.Ormanov, T.Jarokov, D.Ábilov, J.Moldaǵalıev, Q.Bekhojın, Á.Tájibaev, H.Erǵalıev, S.Máýlenov, Ǵ.Qaıyrbekov syndy sańlaqtar edi.
Bul jınaqty ózimiz bala kezimizde jata-jastana oqydyq. Jyldar óte ol jınaq qolǵa túse qoımaıtyn sırek kitapqa, taptyrmaıtyn qazynaǵa aınaldy. Táýelsizdik jyldary da "Manas" qaıta jarııalana qoımapty.
Bul joly jyrdy qazaqsha sóıletken belgili tókpe aqyn, daryndy manasshy Baıanǵalı Álimjanov. О́zi manasshy bolǵandyqtan Baıanǵalı aǵanyń bul nusqasy tek qana jyrdyń taza aýdarmasy emes, kóptegen varıanttardy saralap, uly epopeıanyń shytyrman shúıginin aralap, shyǵarmashylyqpen terip alǵan ózgeshe nusqa deýge bolady.
Sondyqtan kitapqa alǵysóz jazǵan Qyrǵyz Respýblıkasynyń Prezıdenti Sooronbaı Jeenbekov eńbekke joǵary baǵa berdi, ony bir týǵan elderimizdiń dástúrli mádenı baılanystaryn bekemdeıtin týyndy dep baǵalady.
Halyqaralyq Túrik akademııasy buǵan deıin Manastyń sózdigin shyǵaryp, ensıklopedııasyn jarııalaǵan edi. Manasshylar festıvalin ótkizip, Molla Meder Mergenbaev varıantyn latyn álipbıi negizinde shyǵarǵan bolatyn. Bul jınaq sol dástúrdiń jalǵasy ispetti", dep jazdy Darhan Qydyráli.
