Biz habarlasqanda Abdýrahmannyń anasy Aınur poshta bólimshesinde Abdýrahmannyń qolynan shyqqan kartınalardy ózge qalaǵa joldaýǵa kezekte tur eken. Jas óskinniń jaıyn bilgimiz kelgen edi. Ýaqyty tyǵyz bolsa da, kezekten ysyrylyp shyǵyp, keıbir suraǵymyzǵa jaýap berdi. Aıtýynsha, 2009 jyly úıdegi gaz ballony jarylyp, uly Abdýrahman men ózi kúıip qalǵan. Jetkilikti qarjy jınalsa, tezdetip Ońtústik Koreıaǵa jetip, basy men betin, qolyn túgel kúıik shalǵan Abdýrahmanǵa ota jasatýǵa asyǵyp otyr.
– 2009 jyly Oral qalasynda turdyq. Tús kezinde gaz ballony aıaq astynan jarylyp, úıdiń shatyryna deıin qıratyp ketti. Abdýrahmannyń ekiden endi asqan kezi edi, trýbaǵa jaqyn otyrǵan. Terezeden ázer qashyp shyqtyq, – dep eske aldy anasy Aınur Ismaǵulova. Onyń aıtýynsha, aýyr operasııalardan soń ulynyń este saqtaý qabileti nasharlap ketken. Olar ulyn arnaıy mektepte oqytý úshin birneshe jyl buryn Shymkentke kóship kelipti. Biraq bet-aýzynan saý-tamtyq qalmaǵan balaǵa tańyrqap qaraıtyndar munda da kóp, sol úshin Abdýrahman syrtqa shyǵa bermeıdi, uıalady.
– Ulymnyń jarasy ázer jazyldy. Tyrtyǵy qataıyp, ósken saıyn tyrtysyp kedergi keltiredi. Judyryǵyn juma almaıdy, saýsaqtary tyrtyqtan qısaıyp barady. Kúıip qalǵan júzinen syrttaǵy adamdar seskenedi, mekteptegi balalar da óz ortasyna qospaıdy, – deıdi Aınur.
Oıyn balasy ońasha otyryp oı júgirtkendi unatatyn kórinedi. Onysynan táp-táýir dúnıeler shyǵady. Onyń qylqalamynan týǵan tabıǵat kórinisteri kóshirýden, aınytpaı qaıtalaýdan ada. Keskindeme betin órnektegen sezimi men tolǵanysynan, keleshekke degen úmitinen jan dúnıesiniń erekshe jylýyn sezinesiz. Jas sýretshiniń shyǵarmashylyq izdenisi erekshe, beıneleý tilin qalyptastyrýǵa degen talpynysy móldir de tazalyǵymen aıryqsha.
– Sýret salýǵa kishkentaıymnan qushtar boldym. Ásirese tabıǵat kórinisterin salǵandy jaqsy kóremin. Bir kartınany kem degende úsh saǵatta salyp shyǵamyn. Plastıkalyq operasııa jasatý úshin ózim salǵan kartınalarymdy osylaı satyp bastadym, – deıdi Abdýrahman.
Ol dos tapsam deıdi, el qatarly mektepke barsam dep armandaıdy jáne osy armanynyń oryndalatynyna qaltqysyz senedi. Dál osy sebepti de Abdýrahman sýretshilik ónerin tastamaı, emine qarjy jınaýǵa kiristi. Qazaqstannyń ár óńirinen, sondaı-aq Grekııadan, Reseıden onyń kartınalaryn alýǵa ótinish bildirip jatqandar bar. Jetkilikti qarjy jınalsa, tezdetip Ońtústik Koreıaǵa baryp, ota jasatpaqshy. Búginde Abdýrahmannyń óneri týraly estigen erikti top ınstagram áleýmettik jelisi arqyly @sos_abdurahman paraqshasynda kómek jınaýdy bastap ketken. Odan bólek beıneleý óneri stýdııalarynyń jas talapkerleri de kartınalaryn satyp, Abdýrahmannyń emine úles qospaqshy.
Kim bilgen, keskindeme tiliniń tazalyǵyna shynaıy berilgen sheber, bálkı, qazaq beıneleý óneriniń jarqyn juldyzyna aınalar. Eń bastysy, kishkentaı sýretshiniń úlken armany oryndalsa ıgi edi degen janashyr tilekpen barshańyzdy jaqsylyqtyń jarshysy bolýǵa shaqyramyz!
