"Pandemııa kezinde qoǵamdyq baqylaý ınstıtýtynyń qanshalyqty mańyzdy ekenine kózimiz jetti. Qazirgi tańda qoǵamdyq baqylaý fýnksııasyna qoǵamdyq keńester ıe. Alaıda ýaqyttyń ózi bul fýnksııaǵa ıe uıymdardyń tizimin keńeıtý kerektigin kórsetip otyr. Sebebi bizdiń Aqparat jáne qoǵamdyq damý mınıstrligi qoǵamdyq baqylaý fýnksııasyn mindetine alǵan belsendilerdiń jumysynyń úılestirýshisi boldy. Dárihanadardaǵy dári-dármek baǵasynyń ala-qulalyǵy, gýmanıtarlyq kómekti bólý máselesi, medısınalyq uıymdardyń jumysyna qatysty qanshama másele týyndaǵanyn bilesizder. Mine osy rette biz belsendilerge qoldaý bildirdik", dedi Aıda Balaeva Prezıdenttik kadrlyq rezervtegi jastarmen kezdesý barysynda.
Mınıstr óziniń keńesshisi Lıma Dıas osy jumystardyń úılestirýshisi bolǵanyn, búginge deıin búkil respýblıkadaǵy 300-ge tarta belsendi azamat jumys júrgizgenin aıtady.
"Belsendi azamattar dári-dármek baǵasynyń turaqtylyǵy, gýmanıtarlyq kómekti bólý, medısınalyq uıymdardyń jumysy sekildi úsh máseleni nazarǵa alǵan edi. Qoǵamdyq baqylaýdyń arqasynda osy baǵyttaǵy jumysty turaqtandyrýǵa múmkindik aldyq", dedi ol.
Eske sala ketsek búgin elordada Prezıdenttik kadrlyq rezervtegi jastar birqatar mınıstrmen kezdesý ótkizdi. Naqtyraq aıtqanda iriktelip, rezervke engen jastarmen kezdesýge Aqparat jáne qoǵamdyq damý mınıstri Aıda Balaeva, Sıfrlyq damý, ınnovasııalar men aeroǵarysh ónerkásibi mınıstri Baǵdat Mýsın, Prezıdent ákimshiligi basshysynyń orynbasary Málik Myrzalın, sondaı Prezıdenttiń kómekshisi Erlan Qarın shaqyrylǵan. Basqosýdyń basty maqsaty – Prezıdent Joldaýyn talqylap, aldaǵy ýaqytta Prezıdenttik jastar kadrlyq rezervin damytyp,júzege asyrýdy josparlaý.
