Qylmystyq toptyń quramynda Qazaqstan, Reseı jáne Bahreın azamattary bolǵan. Olar Bahreınde seksýaldy eksplýatasııa maqsatynda qyzdardyń, sonyń ishinde kámeletke tolmaǵandardyń saýdasymen aınalysqan. IIM-niń málimetinshe qylmystyq top uzaq ýaqyt boıy 16-25 jas aralyǵyndaǵy qyzdardy izdep, ózderine tartqan. K ózdegen adamdaryn ásirese, Qazaqstannyń ońtústiginde halyqtyń áleýmettik az qamtylǵan tobynan izdegen.
"Qylmyskerler adamdardyń senimin paıdalanyp, shetelde kóp aqsha tabýǵa bolatyny jóninde ótirik sózge sendirgen. Boıjetkender keliskennen keıin olardyń qujatyn rásimdeý, zardap shegýshilerdi, onyń ishinde kámeletke tolmaǵandardy zańdy jolmen Bahreın Koroldigine alyp shyǵýdy uıymdastyrǵan. Bahreınge jetkizilgen árbir boıjetkendi qylmyskerler 5 myńnan 15 myń AQSh dollaryna deıin satqan. Manamaǵa kelgennen keıin olardyń qujattaryn tartyp alyp, zańsyz bas bostandyǵynan aıyryp, uzaq ýaqyt boıy jezókshelikpen aınalysýǵa májbúrlegen. Baǵynbaǵan jaǵdaıda sabap, 500 myń teńgege deıin aqshalaı aıyppul salyp, tipti basqa jeńgetaılarǵa satyp jiberetinderin aıtyp qorqytqan", dep habarlaıdy IIM-nen.
Qazirgi ýaqytta atalmysh faktiler boıynsha QR 135-baby 4-bóligi 2-tarmaǵy (kámeletke tolmaǵandardyń saýdasy) jáne 128-baby 3-bóligi (adam saýdasy) boıynsha sotqa deıingi tergeý amaldary júrgizilip jatyr. Uıymdastyrýshylar ustalyp, ýaqytsha oqshaýlaǵyshqa qamalǵan. Eske sala ketsek, bıylǵy jyl basynda Bahreınde seksýaldy quldyqta bolǵan qazaqstandyq boıjetkender elge qaıtarylǵan bolatyn. Bul týraly QR Syrtqy ister mınıstrliginen málim etken edi.
