Jýyrda oblys ákimi Gúlshara Ábdiqalyqovanyń tóraǵalyǵymen ótken jylý berý maýsymyna daıyndyq jónindegi oblystyq shtab otyrysynda jaýapty merzimge ázirliktiń jaı-japsary aıtyldy.
Birqatar sala basshylarynyń habarlamalaryn tyńdaǵan oblys ákimi qala, aýdandardaǵy jumysty baǵamdaı kele, keıbir máselelerge ýaqtyly mán berip, jumysty tez arada retteýdi tapsyrdy.
– Belkól kentinde jylý qubyrlaryn kúrdeli jóndeý jumystary bekitilgen josparǵa sáıkes júrgizilmeı otyr. Barlyq júzege asyp jatqan jobalar 1 qazanǵa deıin aıaqtalýy qajet. Jóndeý jumystarynyń barysyna arnaıy keste ázirlep, oryndalýy týraly ár aptanyń dúısenbisinde maǵan baıandaýlaryńyz tıis, – dedi oblys ákimi sala basshylaryna.
Gúlshara Naýshaqyzy aýdandarǵa gaz jetkizýdi, áleýmettik nysandarǵa jylý berýdi ýaqtyly iske asyrýdy tapsyrdy. Osy kúni Qarmaqshy, Jalaǵash, Syrdarııa aýdandary ortalyǵyndaǵy gaz taratý stansalaryn paıdalanýǵa qajetti qarjy máselesi sheshildi. Sondyqtan da «QazTransGaz Aımaq» AQ Qyzylorda óndiristik fılıaly osy aýdandarǵa gaz berýdi qaperge alý tıis.
Jıynda oblystaǵy áleýmettik sala nysandarynyń daıyndyǵyna arnaıy toqtalǵan aımaq basshysy oblystyq densaýlyq saqtaý basqarmasynyń jaýapty merzimge ázirligine kúmándi ekenin aıtty. Mysaly, Qazalydaǵy aýdandyq týberkýlezge qarsy dıspanser men Syrdarııa aýdandyq aýrýhanasyndaǵy kúrdeli jóndeý jumystary tolyq aıaqtala qoıǵan joq. Sondyqtan densaýlyq saqtaý basqarmasy basshylyǵy aýdan ákimdigimen birlese otyryp, osy nysandardaǵy jylý júıeleriniń qalypty jumys isteýine mán bergeni jón.
Otyrysta oblys ákimi kópqabatty turǵyn úılerge jylý berý máselesin qarap, jańǵyrtýdan ótken úılerge qatysty qala ákimine birqatar tapsyrma berdi. Sondaı-aq qoımalarǵa qajetti otyn kólemin jetkizýdi shıratý kerektigin aıtty. Oblystyq kásipkerlik jáne týrızm basqarmasy kómir qoımalarynda tapshylyqtyń týyndamaýyn, qystyń kózi qyraýda baǵanyń negizsiz óspeýin qadaǵalaýy kerek.
– Aldyńǵy jyldary kómir tapshylyǵy men baǵanyń kúrt ósýine baılanysty dúrbeleń týǵanyn umyta qoımaǵan bolarsyzdar. Sondyqtan basqarma eki ortadaǵy deldaldardyń jolyn kesip, kásipkerlerdiń kómir óndirýshi mekemelermen tikeleı kelisimshartqa otyrýyn úılestirýi tıis, – dedi óńir basshysy.
Kommýnaldyq salanyń basty problemasynyń biri kórsetilgen qyzmet aqysyn jınaý ekendigi belgili. Osyǵan baılanysty aımaq basshysy oblystyq energetıka jáne turǵyn úı-kommýnaldyq sharýashylyq basqarmasy mekemeler arasyndaǵy bereshek qaryzdardy boldyrmaý sharalaryn qabyldaý kerektigin aıtty. Al oblystyq ekonomıka jáne bıýdjettik josparlaý basqarmasy elektr energııasy tarıfiniń ósýine baılanysty bıýdjettik mekemelerdiń shyǵyndaryn qaıta qaraýy kerek.
Shtab otyrysynda óńir basshysy oblys ákimi apparatynyń uıymdastyrý-ınspektorlyq jumys jáne aımaqtyq damý bóliminiń ınspektorlary 1 qazanǵa deıin qaladaǵy jáne aýdandardaǵy nysandardy aralap, monıtorıng júrgizýi qajettigin de atap ótti.
Qyzylorda oblysy
