Bıyl aýdanda kartop, kókónis, baqsha daqyldarynnyń kólemi de artyp otyr. Mysaly, Sarykól aýyldyq okrýgindegi «Danııar» sharýa qojalyǵy – 20, al Aqjona aýyldyq okrýgi aýmaǵyndaǵy «Dúzbaev Áset» qojalyǵy 23 gektarǵa túrli daqyldar egip, qazir ónimderin ótkizýde. Budan ózge 900 gektar kókónistiń 40, al jalpy kólemi 1050 gektar bolatyn baqsha ónimderiniń 32 paıyzy jınaldy.
Tabıǵat jaǵdaıyna baılanysty basqa aýdanǵa qaraǵanda kúrishke oraq salýǵa keshteý kirisetin aýdanda oraqqa qatysatyn jatka men kombaınnyń 22 danasy sheteldik joǵary ónimdi, sapaly, zamanaýı tehnıkalar. Jalpy, qolda bar 42 kombaın, 29 jatka, 115 traktor, 40 júk kóligi men 59 traktor tirkemesi tolyq daıyndyqtan ótip, egin jınaý jumystaryn bastaýda.
Sharýashylyqtar boıynsha egin jınaý naýqanyna qatysatyn tehnıkalarǵa qajetti qosalqy bólshekter men qoıý maı jáne jaǵar maıdyń qosymsha qorlary jetkilikti.
Bıyl aýdandaǵy aýylsharýashylyq qurylymdary «QazAgroQarjy» AQ arqyly jáne basqa da qarjy kózderinen 652,5 mln teńgege 22 tehnıka satyp alýdy josparlasa, búginde 359 mln teńgege 16 tehnıka alyndy.
Aýdan boıynsha kúrishtiń sýyn baılaý, orý jáne bastyrýdyń kestesi bekitilip, alqaptardyń sýyn tartý 5 tamyzdan bastalyp, búginde aýyl sharýashylyǵy qurylymdary boıynsha 6 496 gektar kúrishtiktiń saǵasy tolyq baılandy.
Osy kúnge deıin myń gektardan astam alqaptyń kúrishine oraq túsip, 490 gektar jerdiń kúrishi bastyryldy. Ortasha ónim gektaryna 40 sentnerden aınalýda.
Qyzylorda oblysy
