Aldymen aımaq basshysy Áıtek sý torabynda boldy. Osydan 16 jyl buryn «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasy aıasynda salynyp, qoldanysqa berilgen qurylǵy ózen aǵysyn rettep, Syrdarııa jáne Jalaǵash aýdandaryndaǵy egindik alqaptardy sýmen qamtamasyz etedi. Byltyr sekýndyna 750 tekshe metr sý ótkizetin qurylǵynyń beton dýaldary zaqymdalyp, tehnogendik sıpattaǵy tótenshe jaǵdaı jarııalanǵan edi. Osyǵan baılanysty oblystyq bıýdjetten 38 mln teńgeden astam qarjy bólinip, dýaldar 13 myń tonna taspen bekitildi. Biraq bul ýaqytsha shara edi. Mamandar sol tusta qos aýdannyń qajetine jarap turǵan sý tospasy apatqa ushyrasa, myńdaǵan gektar qańsyp qalyp, 31 myń adam turatyn 7 eldi mekendi sý basýy múmkin ekendigin basa aıtqan. Osy jyly oblys basshysy Gúlshara Ábdiqalyqova máseleni Úkimet aldynda kóterip, sý torabyn tolyq qalpyna keltirýge respýblıkalyq bıýdjetten 700 mln teńge bólindi.
– Endigi maqsat osy qarajatty durys ıgerip, sý torabyn qalypqa keltirý jumystaryn sapaly isteý. Bul aýdan basshysynyń turaqty nazarynda bolýy tıis, – dedi Gúlshara Ábdiqalyqova.
Osy aýdandaǵy Aqjarma aýylynda «Aýyl – el besigi» baǵdarlamasy aıasynda aıtarlyqtaı jumys jasalyp jatyr. Memlekettik baǵdarlama sheńberinde aýyldaǵy jalpy uzyndyǵy 13,6 shaqyrym bolatyn 9 kósheni ortasha jóndeýge 614 mln teńge qaralypty. Munymen qosa, aýyldaǵy 4 kósheni jaryqtandyrýǵa, 3 kóshege temir betondy lotok ornatýǵa qarjy bólingen. Aımaq basshysy aýdan ákimi men merdiger kompanııa jetekshisine jóndeý jumystaryn tezdetip aıaqtaýdy jáne sapaly oryndaýdy tapsyrdy.
Bul aýylda eki iri sharýashylyq bar. Eki qurylym da eldi mekendegi áleýmettik máselelerdiń ońynan sheshilýine, aýyldy gúldendirýge úles qosyp keledi. Mysaly, byltyrǵy Jastar jylyna oraı «Aqjarma 2» fermerlik qojalyǵy jastarǵa jalaqy tólep, saıabaq salýǵa jumyldyrǵan. Qazir aýyl ortasynda jaıqalyp turǵan Jastar saıabaǵy osy eńbektiń nátıjesi.
Qojalyq «Qarapaıym zattar ekonomıkasy» baǵdarlamasy boıynsha «Agrarlyq nesıe korporasııasy» aksıonerlik qoǵamynan 56 mln teńgeden astam nesıe alypty. Oǵan Chehııadan arnaıy kúrish tazalaǵysh qurylǵy ákelip, iske qosty. Qazir qyrmanda burynǵydaı ala shańǵa kómilip, jantalasyp jatqan jurt joq. Sharýanyń beınetin jeńildetken qurylǵy óz tıimdiligin kórsetip tur. Apparat saǵatyna 50 tonna kúrish tazartady. Sharýashylyqty ártaraptandyrý arqyly 2023 jylǵa deıin kúrish aqtaıtyn zaýyt, pasterlengen sút zaýyty, jylyjaı jáne kókónis qoımasyn salý jumystary josparlanypty. Aımaq basshysyn atqaryp jatqan jumystarmen tanystyrǵan sharýashylyq jetekshisi Marat Bısenov bıyl 2000 gektarǵa kúrish egip, qazir onyń teń jartysy jınalǵanyn aıtyp ótti. О́nim gektaryna 60 sentnerden aınalýda. Fermerlik qojalyq 2017 jyldan beri ártaraptandyrý baǵytynda 350 gektarǵa alma aǵashyn ekken. Osy jyly baqtan alǵashqy ónim alyndy.
Sapar aıasynda oblys basshysy «Shaǵan Jer» jaýapkershiligi shekteýli seriktestigindegi №1 óndiristik brıgadasynyń egis alqabynda boldy. Seriktestikte 350 adam jumyspen qamtylǵan.
Al Naǵı Ilııasov aýylyndaǵy «Maǵjan ı K» seriktestiginiń qyrmanynda saǵatyna 5 tonna kúrish tazalanyp, eki aýysymda 40 adam jumys isteıdi. Bıyl 5 myń gektardan astam alqapqa kúrish sepken dıqandar qazir jartysyna jýyǵyna oraq salǵan. Aýyldyń áleýmettik máselesin sheshýge sergek qaraıtyn azamattar sharýashylyqtaǵy jumysshylardyń jaǵdaıyna da qaraılasyp turady.
– Qazirgi basty máseleler egin jınaý naýqany men qysqy mezgilge daıyndyq bolyp tur. Bul jumystar udaıy baqylaýda turady. Jalpy, aýdanda kúrish 30 paıyz jınalǵan. Naýqan ýaqtyly bitedi dep josparlanýda. Al aýdandyq aýrýhananyń jylý júıesinde birqatar másele bolǵany ras. Búginde ony jóndeý jumystary júrgizilýde. Qazandyqty aýystyryp, jylý qubyrlaryn jańartý 10 qazanǵa deıin aıaqtalýy tıis, – dedi oblys ákimi sapar sońynda BAQ ókilderine bergen suhbatynda.
QYZYLORDA
