Osy shara kezinde Qazaly qalasyndaǵy bir otbasynyń baspanasyn kórgen Marhabat pen Mereı «Qalaıda myna kisige úı salyp berý kerek» degen uıǵarymǵa kelip, áleýmettik jelide qatarlastaryna oı tastaıdy. Qatty bir nóser jaýsa, qulap qalardaı jaǵdaıda turǵan baspanany panalap, tórt balasyn jalǵyz ózi asyrap otyrǵan ákeniń jaǵdaıyna qanyqqan jastar bul bastamany qoldap, kásipker jigitter aqshalaı da, qurylys jabdyqtarymen de qamtamasyz etti.
– Birinshi mamyr kúni jańa úıdiń irgetasyn quıdyq. Qazaly qalasyndaǵy Danııar Erǵabylov bastaǵan jas jigitter birden birigip, asarlatyp áketti. Kirpishin qalaý, tóbesin jabý, árleý sııaqty jumystar retimen sheshilip jatty, – deıdi qatarlaryn qaıyrymdylyqqa úndegen qyzdar.
Kásibi toqtap turǵanymen de biraz isker azamat bul iske úles qosypty. Qajetti kirpishti Nurtaı Amanov túsirip berse, shatyrǵa qajetti qańyltyrdy Danııar Balmahanov atty azamat ápergen. Úı ıesiniń kolledjde oqıtyn ulynyń dostary men ustazdary da edenge qajetti aǵash áperip, qaıyrymdylyq tanytýdan qalys qalmapty.
Marhabat pen Mereı bastaǵan is erikti jastardyń arqasynda jaqynda bitti. Úı aınalasyn osy Qazaly qalasynyń jigitteri qorshap, qaqpasyn da ornatyp beripti.
Kez kelgen máseleniń dereý sheshilýine áleýmettik jeliniń de kómegi kóp bolyp turǵanyn aıta keteıik. Mysaly, indet órshigen tusta jeli arqyly aýdan turǵyndaryna úndeý tastalyp, qazalylyqtar az ýaqytta ottegi konsentratorlaryn alý úshin qomaqty qarjy jınap úlgerdi. Jınalǵan qarajatqa 6 apparat, qorǵanysh kostıýmderi men betperdeler alynyp, aýrýhanalarǵa berildi.
Jaqynyna janashyrlyq tanytatyn sharalardan jekelegen azamattar da shet qalǵan joq. Osy aýdandaǵy Káýkeı aýylynyń týmasy, belgili kásipker Baqytbek Katen jerlesterine 14 ottegi konsentratoryn alyp berdi. Onyń 10-y aýdandyq aýrýhanaǵa, tórteýi Káýkeı aýylyndaǵy emhanaǵa tabystaldy.
Qyzylorda
